ՆախընտրելիԵրեւան-Սեւան ճանապարհի 28-րդ կիլոմետրին, մոտ երեք տասնյակ մեքենաներ հայտնվել են ձնաբքի մեջ: Այս մասին դեպքի վայրից NEWS.am-ի թղթակցի հետ զրույցում հայտնել է Ճանապարհային ոստիկանության երկրորդ սպայական գումարտակի հրամանատար Արսեն Արշակյանը:
«ՃՈ 2-րդ սպայական գումարտակի անձնակազմն` իմ գլխավորությամբ, Տրանսպորտի եւ կապի նախարարության ու Արտակարգ իրավիճակների նախարարության աշխատակիցների հետ միասին կարողացել ենք այդ մեքենաները հանել ձյան տակից, մնացել է մի քանի մեքենա»,-հավաստիացրել է Արշակյանը:
Իր ցուցումով Արզնիի եւ Սեւանի հատվածից փակել են ճանապարհը, քանի որ սարից մեծ քանակությամբ ձյուն է թափվել եւ քամու եւ ձնաբքի պատճառով կարող է մեքենա մնալ ձյան տակ: «Ամբողջ տեխնիկան այնտեղ է, ոստիկանության 2-րդ գումարտակի եւ 9-րդ վաշտի անձնակազմի հետ միասին այնտեղ ենք: Քամին դադարելուն պես տեխնիկան կսկսի մաքրել ճանապարհը: Իմ ցուցումով փակվել է նաեւ Երասխավան-Երեւան ճանապարհը, որտեղ սակայն ձնաբքի հետեւանքով մեքենա չի մնացել ձյան տակ: Ճանապարհը բաց է, ուղղակի փակել ենք, որ երթեւեկություն չլինի, ու ժողովուրդը չհայտնվի ձնաբքի մեջ»,-ասել է Արսեն Արշակյանը:
Նա հավաստիացրել է, որ ցրտից տուժածներ չկան: Ցրտահարված քաղաքացիներին աջակցել են ոստիկանական մեքենաներում տաաքացնելով, հիվանդանոց ոչ ոք չի տեղափոխվել:
«Մեր ճանապարհային ոստիկանության մեքենաներով, տեխնիկաներով ենք նրանց քաշել հանել: Ով որ մրսել էր, նստեցրել ենք ՃՈ մեքենաներում, ոչ մեկին ոչինչ, բարեբախտաբար չի եղել»,- ամփոփել է Արշակյանը:
