Իրանի իշխանությունները ներման ենթակա բանտարկյալների ցուցակներից հանել են այն անձանց, ովքեր մեղադրվում են երկրում վերջերս տեղի ունեցած անկարգություններին մասնակցելու և դրանք կազմակերպելու մեջ։ Այս մասին երկուշաբթի օրը հայտարարել է Իրանի Իսլամական Հանրապետության դատական իշխանության ղեկավար Գոլյամ-Հոսեյն Մոհսենի-Էժեին։

«Հաշվի առնելով ստեղծված իրավիճակը և վերջին զինված անկարգությունները՝ ես հրահանգ եմ տվել համաներման ցուցակից հանել բոլոր այն դատապարտյալների անունները, ովքեր որևէ կերպ առնչություն ունեն անվտանգության հարցերի հետ։ Վերջին անկարգությունների համար դատապարտված անձինք նույնպես չեն ներառվի ներման ցուցակներում»,- ասել է Մոհսենի-Էժեին, նրա խոսքերը մեջբերում է իրանական IRIB հեռուստառադիոընկերությունը։

Իրանում բողոքի ցույցերը սկսվել են 2025 թվականի դեկտեմբերի վերջին՝ ազգային արժույթի արժեզրկման պատճառով, սակայն հետագայում վերածվել են անկարգությունների և իշխանությունների դեմ ուղղված գործողությունների, որոնք իրենց գագաթնակետին են հասել տապալված իրանական շահի որդու՝ Ռեզա Փահլավիի կոչերից հետո։ Երկրում դադարել է գործել ինտերնետը, հաղորդվել է, որ զոհեր կան ինչպես ուժայինների, այնպես էլ ակցիայի մասնակիցների շրջանում։ Իրանի իշխանությունները, որոնք ԱՄՆ-ին և Իսրայելին մեղադրել են անկարգությունների կազմակերպման մեջ, հունվարի 12-ին հայտարարել են, որ իրավիճակը հաջողվել է վերցնել վերահսկողության տակ։