Ղազախստանի երրորդ խոշորագույն քաղաքում՝ Շիմկենթում անհայտ անձինք, անօրինական խճաքար արդյունահանելիս, ոչնչացրել են վերջերս կառուցված 4.5 միլիոն դոլար արժողությամբ ափամերձ պաշտպանության ամբարտակի մի մասը: Այս մասին հայտնել են Շիմկենթի քաղաքային միջավայրի զարգացման վարչությունից։

Գերատեսչության տվյալներով՝ Բադամ գետի ափամերձ գծի շուրջ 5,3 կիլոմետր հատվածն ամրացվել էր 2025 թվականին՝ հեղեղումները կանխելու նպատակով։ Աշխատանքներն ավարտվել էին 2025 թվականի դեկտեմբերին և դրանց համար հատկացվել էր 2,7 միլիարդ տենգե (մոտ 4,5 միլիոն դոլար)։

Պարզվել է, որ գետի հունում էքսկավատորի օգնությամբ իրականացվել են խճի արդյունահանման ապօրինի աշխատանքներ, ինչի հետևանքով ամբարտակի 40 մետր հատված է քանդվել։ Չարագործների ձերբակալության մասին չի հաղորդվում. նշվում է, որ իրավապահ մարմիններն աշխատում են մեղավորների ինքնությունը պարզելու ուղղությամբ։

Քաղաքի աքիմատը հավաստիացրել է, որ հեղեղման վտանգ չկա։ Վնասված ամբարտակի վերականգնումը նախատեսվում է պարտադրել կապալառուին, որը օբյեկտի համար յոթ տարվա երաշխիք է տվել։ Նշենք, որ նախկինում Բադամ գետը ուժեղ տեղումների ժամանակ բազմիցս դուրս է եկել ափերից։