նախընտրելի դարձնել
Շրի Լանկայի ոստիկանությունը ձերբակալել է երկրի հետախուզության նախկին պետին՝ 2019 թվականի մահապարտների իրականացրած ահաբեկչությունների համար։ Այդ հարձակումների հետևանքով զոհվել է գրեթե 270 մարդ։ Ենթադրվում է, որ դրանք հրահրվել էին «Իսլամական պետություն» խմբավորման կողմից, հայտնում է AFP-ն։
Ոստիկանության խոսնակ Ֆրեդրիկ Վուտլերը հայտնել է, որ չորեքշաբթի օրը քրեական հետախուզության վարչությունը բերման է ենթարկել բանակի պաշտոնաթող գեներալ-մայոր Սուրեշ Սալլիին։
2019 թվականի ապրիլի 21-ին՝ Սուրբ Զատկի տոնին, իսլամիստական երկու խմբավորումներ գրեթե միաժամանակյա վեց պայթյուն են իրականացրել եկեղեցիներում և շքեղ հյուրանոցներում։ Այս ահաբեկչական գործողությունները կատարվել են մահապարտների միջոցով։
Գեներալ-մայոր Սալլին ռազմական հետախուզության փորձառու սպա է, ով մեծ ավանդ է ունեցել 2009 թվականին երկրում քաղաքացիական պատերազմի ավարտի գործում։ Ոստիկանության ներկայացուցիչ Վուտլերի փոխանցմամբ՝ քրեական հետախուզությունն այժմ քննում է 2019-ի ողբերգական իրադարձությունների ժամանակ Սալլիի հնարավոր առնչությունը կամ թույլ տված բացթողումները։ Հատկանշական է, որ դեռ այն ժամանակ կասկածներ էին հնչում, թե հարձակվողները կարող էին կապեր ունենալ Շրի Լանկայի պետական հետախուզական մարմինների հետ։
2023 թվականին բրիտանական Channel 4 հեռուստաալիքը հարցազրույց է հրապարակել մի անձի հետ, ով պնդում էր, թե ինքն է կազմակերպել Սալլիի հանդիպումը «Իսլամական պետությունից» ներշնչված տեղական «National Thowheed Jamath» խմբավորման հետ։
Ըստ այդ հայտարարության՝ այդ հանդիպման նպատակն է եղել Շրի Լանկայում անկայունության մթնոլորտ ստեղծելը։ Դա պետք է հող նախապատրաստեր նախկին նախագահ Գոտաբայա Ռաջապակսեի համար, որպեսզի վերջինս հաղթանակ տաներ նույն տարվա վերջին կայանալիք նախագահական ընտրություններում։
