Եթե ԱՄՆ նպատակը Իրանում ռեժիմի փոփոխությունն է, դրան հասնելը չափազանց դժվար կլինի, այսօր՝ մարտի 2-ին, «Իրանում տեղի ունեցած իրադարձությունները և միջազգային իրավունքի քայքայումը» խորագրով կլոր սեղանի ժամանակ հայտարարել է «Ռոսսոտրուդնիչեստվո»-ի ղեկավար Եվգենի Պրիմակովը:

Խոստովանելով, որ վերջերս եղել է Իրանում և ականատես եղել անկարգությունների հետևանքներին՝ այրված վարչական շենքեր և մզկիթներ, Պրիմակովը նշել է, որ ռեժիմի կայունության հիմնական ցուցանիշն անվտանգության ուժերի վիճակն է: «Ես չեմ զգացել որևէ դասալքություն կամ պառակտում համակարգի ներսում: Նույնիսկ, հակառակ մի քանի բարձրաստիճան պաշտոնյաների վերացման մասին հաղորդագրություններին, ներքին անկայունության մասին խոսելը վաղաժամ է»,- հայտարարել է նա:

Ըստ Պրիմակովի՝ ստեղծված իրավիճակում գլխավոր հարցն այն է, թե արդյոք ԱՄՆ-ն ունի՞ հակամարտությունից դուրս գալու ռազմավարություն: «Դժվար է ասել, թե որքան կտևի հակամարտությունը: Գնահատականներ են հնչում մի քանի շաբաթվա  մասին: Սակայն շատ բան կախված է կողմերի ռեսուրսներից, առաջին հերթին՝ նրանց հրթիռային պաշտպանության համակարգերի հնարավորություններից»,- կարծում է նա: Պրիմակովը չի բացառել այն հնարավորությունը, որ որոշակի պահի ամերիկյան ղեկավարությունը կարող է որոշել հայտարարել «հաղթանակի» մասին, թե երբ դա տեղի ունենա՝ քաղաքական նպատակահարմարության հարց է։

Նա նաև մատնանշել է տարածաշրջանային այլ պետությունների, մասնավորապես՝ արաբական ծոցի երկրների, հակամարտության մեջ ներքաշվելու առկա ռիսկը: «Առայժմ նրանց դիրքորոշումը պահպանվում է: Նույնիսկ Սաուդյան Արաբիան, որը ավանդաբար քննադատաբար է տրամադրված Իրանի հանդեպ, նախկինում կասկածամտորեն է մոտեցել ռազմական գործողության նպատակահարմարությանը: Սակայն իրավիճակը կարող է փոխվել ցանկացած պահի, եթե հարվածները հարվածեն որևէ զգայուն ենթակառուցվածքի»,- նշել է Պրիմակովը։

Թուրքիայի դիրքորոշումն առանձին հարց է: Անկարան ավանդաբար քննադատել է Թեհրանի քաղաքականությունը, բայց միշտ ընդգծել է, որ Իրանի կայունությունը համապատասխանում է Թուրքիայի ազգային շահերին: Որքան հայտնի է, թուրքական տարածքը և ՆԱՏՕ-ի բազաները չեն օգտագործվել Իրանի դեմ հարվածներ հասցնելու համար: