Իրանի միջուկային ծրագրի վերաբերյալ իմ զեկույցներում ես միշտ արտահայտել եմ հստակ և հետևողական դիրքորոշում. չնայած չկան ապացույցներ, որ Իրանը միջուկային ռումբ է ստեղծում, նրա հարստացված ուրանի զգալի պաշարները, որոնք մոտ են զենքի համար նախատեսված որակին, և իմ տեսուչներին լիարժեք մուտքի իրավունք չտրամադրելու մերժումը լուրջ մտահոգություններ են առաջացնում։

Դրա  մասին սոցիալական ցանցերում գրել է Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսին։

«Այս պատճառներով իմ նախորդ զեկույցներում մատնանշվում է, որ մինչև Իրանը չլուծված անվտանգության հարցերի շուրջ չհամագործակցի ԱԷՄԳ-ի հետ, գործակալությունը չի կարողանա երաշխիքներ տալ, որ Իրանի միջուկային ծրագիրը բացառապես խաղաղ բնույթ ունի»,- նշել է Գրոսսին։