Al-Monitor պարբերականի փոխանցմամբ՝ Իրանի կենտրոնական իշխանությունների դեմ պայքարող քրդական հակակառավարական խմբավորումները պաշտոնապես դիմել են Միացյալ Նահանգներին՝ խնդրելով ոչ թռիչքային գոտի սահմանել Իսլամական Հանրապետության հյուսիսարևմտյան քրդաբնակ շրջաններում։

Ինչպես նշվում է, ԱՄՆ ներկայացուցիչները հանդիպումներ են անցկացրել իրաքցի և իրանցի քրդերի հետ Իրաքյան Քուրդիստանի տարածքում (Իրաքի հյուսիսում գտնվող ինքնավար տարածաշրջանում)։ Աղբյուրների փոխանցմամբ՝ ամերիկյան կողմը քրդական կազմավորումներին առաջարկ է փոխանցել՝ Իրանի կենտրոնական իշխանությունների դեմ դիմակայության հարցում աջակցության վերաբերյալ։ Մասնավորապես, պնդվում է, որ ԱՄՆ բանակն ակտիվացրել է երկրի քրդական շրջանների ռազմական օբյեկտների ուղղությամբ հարվածները՝ տեղի զինված խմբավորումների հնարավորություններն ընդլայնելու նպատակով։

Միևնույն ժամանակ, Վաշինգտոնը դեռևս պատասխան չի տվել քրդական կազմավորումների ղեկավարությանը՝ հնարավոր ապստամբության դեպքում կառավարական ուժերի հարվածներից պաշտպանվելու նպատակով ոչ թռիչքային գոտի սահմանելու վերաբերյալ։

Իրաքցի և իրանցի քրդական կազմավորումները, որոնք հիմնականում գտնվում են Իրաքյան Քուրդիստանում և Իրանի սահմանամերձ շրջաններում, նույնպես դեռևս որոշում չեն կայացրել կառավարական ուժերի դեմ մարտական գործողություններ սկսելու վերաբերյալ։ Մասնավորապես, իրաքցի քրդերը մտավախություն ունեն, որ Իրանը կարող է պատասխան հարվածներ հասցնել ինքնավար տարածաշրջանի տարածքին։

Ավելի վաղ The Wall Street Journal թերթը հայտնել էր, որ Սպիտակ տունը դիտարկում է իրանական ընդդիմադիր ուժերին, այդ թվում՝ քրդական կազմավորումներին աջակցելու տարբերակը։ Մարտի 1-ին ԱՄՆ նախագահ Դոնալդ Թրամփը հեռախոսազրույցներ է անցկացրել Իրաքի և Իրանի սահմանի երկայնքով գործող քրդական ջոկատների առաջնորդների հետ։