Մետրոպոլիտենում առաջացած տեխնիկական խափանումը վերացվել է։ Այս մասին հայտնում են Երևանի մետրոպոլիտենից՝ նշելով, որ այս պահին երթևեկությունը վերականգնված է և իրականացվում է բնականոն, երկկողմանի ռեժիմով ուղևորափոխադրում:

Ավելի վաղ NEWS.am—ը հայտնել էր, որ Երևանի մետրոպոլիտենի աշխատանքի խափանման պատճառով մեծ կուտակումներ են առաջացել մետրոյի կայարաններում։

Մարդիկ փորձում են աշխատանքի վայր հասնել տաքսիներով, ինչը հանգեցրել է տաքսու գների շեշտակի աճի։

Մետրոպոլիտենից այս առնչությամբ հայտնել էին. «Մետրոպոլիտենի աշխատանքների խափանում է տեղի ունեցել, ուղևորներին՝ 10 րոպե սպասելուց հետո, իջեցրել են վագոններից։

Մետրոպոլիտենը հանդես է եկել պարզաբանմամբ, որտեղ նշվում է.

«Հոսանքի տատանումների հետևանքով մետրոպոլիտենի բաց հատվածում առաջացել է տեխնիկական խափանում։

Այս պահին մասնագետները տեղում իրականացնում են անհրաժեշտ աշխատանքներ՝ խնդիրը հնարավորինս արագ վերացնելու և երթևեկությունը լիարժեք վերականգնելու համար։

Մինչ այդ մետրոպոլիտենը կանցնի մեկ գծանի երկկողմանի երթևեկության։

Հարգելի՛ ուղևորներ, հայցում ենք Ձեր ըմբռնումն ու ներողամտությունը»։