Բանակցային գործընթացում Ադրբեջանը Հայաստանի Հանրապետության Սահմանադրությունը փոփոխելու վերաբերյալ պահանջ չի ներկայացնում։ Այս վիճահարույց հավաստիացմամբ մարտի 23-ին խորհրդարանի Արտաքին հարաբերությունների մշտական հանձնաժողովի նիստում՝ ՀՀ Կառավարության ծրագրի (2021-2026 թթ.) 2025 թվականի կատարման ընթացքի և արդյունքների մասին հաշվետվությունը ներկայացնելիս, հանդես է եկել արտաքին գործերի նախարար Արարատ Միրզոյանը։

Այնուամենայնիվ, ինչպես նշել է նախարարը, Բաքուն զգուշացնում է, որ չի ստորագրի խաղաղության պայմանագիրը ներկայիս կետերի պահպանման դեպքում։ Ըստ նրա՝ Երևանը բազմիցս հայտարարել է, որ ՀՀ Սահմանադրության մեջ Ադրբեջանի համար խնդրահարույց կետեր չկան, մասնավորապես՝ որևէ տարածքային հավակնություն։ Ավելին, կողմերը ստորագրել են փաստաթուղթ՝ հղում անելով Ալմա-Աթայի հռչակագրին, որը բացառում է նմանատիպ հավակնությունները։

«Մյուս կողմից, եթե ինչ-որ մեկը տեսնում է նմանատիպ հավակնություններ քաղաքական կամ այլ հարթակում, ապա հավասարապես կամ նույնիսկ ավելի շատ դրանք կարելի է տեսնել Ադրբեջանի Սահմանադրության մեջ»,- նշել է Միրզոյանը:

Իլհամ Ալիևի կանոնավոր և միանգամայն թափանցիկ հակառակ հայտարարությունների ֆոնին նա կրկին հավաստիացրել է, թե Ադրբեջանի նախագահն իբր Հայաստանից չի պահանջում փոփոխություններ կատարել Սահմանադրության մեջ։ «Ուզում եմ հավաստիացնել, որ Ադրբեջանը Հայաստանի Հանրապետության Սահմանադրությունը փոփոխելու վերաբերյալ պահանջ չի ներկայացնում։ Բայց կա այլ բան, և նրանք այդ մասին խոսում են հրապարակավ։ Երբ մենք ասում ենք, որ մեր Սահմանադրությունը չենք կարող քննարկել ձեզ հետ, քանի որ դա Հայաստանի ներքին գործն է և բանակցությունների թեմա չէ, նրանք ասում են «շատ լավ, դա ձեր ներքին գործն է, մենք չենք բանակցում դրա շուրջ, պարզապես տեղեկացնում ենք, որ քանի դեռ ձեր Սահմանադրությունն այս ձևակերպումներն ունի, մենք չենք պատրաստվում վերջնականապես ստորագրել խաղաղության համաձայնագիրը»,- ասել է ՀՀ ԱԳ նախարարը՝ մեջբերելով իր ադրբեջանցի գործընկերներին։ Նրա խոսքով՝ հայկական կողմն արդեն ի գիտություն է ընդունել այս դիրքորոշումը։ «Եվ այո, այս հարցում կողմերի մոտեցումները տարբերվում են»,- խոստովանել է գերատեսչության ղեկավարը