նախընտրելի դարձնել«Արմավիր» ՔԿՀ մուտք չգործած, Դավիթ Մինասյանն ունեցել է գիտակցության կորուստ, այսինքն մի բան, ինչի մասին մենք ահազանգում էինք այս մի քանի օրը. Իր մոտ դա ախտորոշված է՝ ուշագնացություն, կոլապս, ընդ որում, դա ախտորոշումներից միայն մեկն է։ Այս մասին այսօր՝ ապրիլի 1–ին, «Էջմիածին» ԲԿ–ի բակում լրագրողների հետ զրույցում ասաց փաստաբան Լուսինե Մարտիրոսյանը՝ հավելելով, որ Դավիթին տեղափոխել են Էջմիածին ԲԿ, սակայն քիչ առաջ վերադարձրել են «Արմավիր» ՔԿՀ։
«Շտապօգնություն են հրավիրել, բնականաբար «Արմավիր» ՔԿՀ–ում չեն կարողացել ցույց տան առաջին բժշկական օգնությունը, քանի որ Դավիթը ունի նաև չպարզված ալերգիա։ Ասինքն այստեղ բժշկական օգնության հետ կապված, մենք ունենք շատ լուրջ խնդիր։
Հիմա, ինչպես տեսաք, հիվանդանոցից նորից տեղափոխեցին քրեակատարողական հիմնարկ, շտապողականությունն ակնհայտ էր։ Մենք անգամ չհասցրեցինք բժշկական փաստաթղթերը բերել, ներկայացնել։ Մենք ուզում էինք, փաստաթղթերը ներկայացնել, որ բժիշկը ծանոթանար, որպեսզի կարողանար եզրահանգում անել, թե ինչի հետևանք կարող է լինել գիտակցության կորուստը։ Բայց չհասցրեցինք, տարան ՔԿՀ։
Ես ուղղակի ահազանգում եմ՝ կրթության նախարար, առողջապահության նախարար, մարդու իրավունքների պաշտպան, ո՞ւր եք։ Կրթության նախարար, քո դպրոցական երեխային զրկել են ազատությունից, որը տառապում է ծանր հիվանդություններով։ Եզակի դեպք է, այսպիսի դեպք մենք չենք ունեցել։ Ոչ մի արձագանք չկա, ի՞նչ է արել այս երեխան իրավական տեսանկյունից։ Այստեղ չկա իրավաբանություն»,–ասաց նա։
Փաստաբան Վարդուհի Էլբակյանն էլ ասաց, որ իր մոտ միայն երկու փաստաթղթի պատճեն է եղել, դրանք է ներկայացրել։ «Ինձ ընդամենը աշխատողներից մեկն ասաց՝ Հայաստանի կեսը այս ամեն ինչը ունի։ Դավիթը չի նվնվում, անընդհատ չի տնքում, չի ասում՝ ես վատ եմ, բայց Դավիթը իհարկե լավ չէր, դուք տեսա՞ք իր վիճակը, այսօր ընդհանրապես որևէ բան դեռ չէր կերել։ Ինքը գրեչկայից, եգիպտացորենից, բրնձից, ամեն ինչից ալերգիա ունի։ Ինքը հատուկ սննդակարգով է սնվում։
Լավ, մենք հայտարարեցինք, որ էս երեխան էսքան հիվանդություն ունի, երեք րոպե սպասեք, մայրը բժշկական փաստաթղթերը բերի։ Բա բժիշկները չսպասե՞ն, մի հատ ասեին՝ հլը բերեք տեսնենք էդ ինչի մասին եք դուք խոսում։ Էս երեխեն կարող է մի հատ ԿՏ-ի կարիք ուներ, կարող է սոնոգրաֆիայի կարիք ուներ, հլը բերեք ձեր էդ թղթերը տեսնենք ինչի մասին է, երեք օրը խոսում ենք ախր էդ մասին։ Իրենց հետազոտությունն ավարտվեց ընդամենը հարցնելով, թե «ո՞նց ես, տղա՛ ջան», մի հատ էլ սոնոգրաֆիա արեցին»,- նշեց Էլբակյանը։
Ավելի վաղ NEWS.am–ը հայտնել էր, որ Սուրբ Աննա եկեղեցու բակում միջադեպի մասնակից 18–ամյա դպրոցական Դավիթ Մինասյանն այսօր դատարանի որոշմամբ 2 ամսով կալանավորվեց։
Երեկ նրա եղբայր Միքայել Մինասյանը ազատ էր արձակվել, նրա նկատմամբ կիրառվել է չբացակայելու արգելք խափանման միջոցը։ Նույն գործող անցնող հասարակական գործիչ Գևորգ Գևորգյանը ևս ազատ էր արձակվել 5 մլն գրավի դիմաց։
Հիշեցնենք, որ մարտի 29–ին, Սուրբ Աննա եկեղեցում Փաշինյանի մասնակցությամբ միջադեպ է եղել, Փաշինյանի թիկնապահները նախ հրելով ճանապարհ են բացել, իսկ երբ երիտասարդը նշել է, որ ցանկացել է իր տեղում կանգնած մնալ՝ վեճ է եղել։ Ավելի ուշ ոստիկանները ուժի կիրառմամբ եկեղեցուց բերման ենթարկեցին երիտասարդներին։
Այս գործով 3 անձ ձերբակալվել է, նրանից երկուսը 18 տարեկան երկվորյակ եղբայրներ են՝ Դավիթ ու Միքայել Մինասյանները, երրորդը հասարակական գործիչ Գևորգ Գևորգյանն է։
Փաստաբան Լուսինե Մարտիրոսյանի խոսքով եղբայրներն ունեն բանտարկության հետ անհամատեղելի հիվանդություն։
ՔԿ–ի հաղորդմամբ. «մարտի 29-ին Սուրբ Աննա եկեղեցում տեղի ունեցած միջադեպի առթիվ նախաձեռնված քրեական վարույթի նախաքննության ընթացքում
Դ.Մ.-ի (Դավիթ Մինասյան) նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 1-ին մասով (խուլիգանությունը) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը),
Մ.Մ.-ի (Միքայել Մինասյան) նկատմամբ՝ 46-297-րդ հոդվածի 1-ին մասով (խուլիգանությանն աջակցելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելուն աջակցելը) և
Գ.Գ.-ի (Գևորգ Գևորգյան) նկատմամբ՝ 46-297-րդ հոդվածի 1-ին մասով (խուլիգանությունը կազմակերպելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը կազմակերպելը)»։
