նախընտրելի դարձնել
Իրաքի դատական իշխանությունները երեքշաբթի հայտարարել են, որ երկու օտարերկրացի կալանավորների են փոխանցել Ֆինլանդիային և ԱՄՆ-ին, երբ պարզվել է, որ նրանք Իսլամական Պետության անդամ չեն, հաղորդում է Ֆրանսպրես գործակալությունը (AFP)։
Իրաքի շատ բանտեր գերբնակեցված են ահաբեկչության մեջ կասկածյալներով։ Փետրվարին ԱՄՆ-ն ավարտել է Իսլամական Պետության 5700 կալանավորների, դրանց թվում՝ հարյուրավոր օտարերկրացիների, տեղափոխումը Սիրիայից Իրաք։
Միջազգային դատական համագործակցության ազգային կենտրոնը (NCIJC) հայտարարել է, որ «երկու կասկածյալների՝ Ֆինլանդիայից մեկ անչափահասի և ԱՄՆ-ից մեկ այլ անձի՝ փոխանցել է իրենց երկրների իրավասու մարմիններին, երբ հաստատվել է, որ նրանք ԴԱԻՇ-ի ահաբեկիչներ չեն», օգտագործելով Իսլամական Պետության արաբերեն հապավումը։
«Փոխանցումը տեղի է ունեցել բոլոր իրավական և դատական գործընթացները կատարելուց հետո»,- ասվում է դատական իշխանությունների՝ Իրաքի լրատվական գործակալության (INA) հրապարակած հայտարարության մեջ։
Դատական իշխանությունները չեն նշել՝ արդյո՞ք երկու կալանավորները Սիրիայից փոխանցվածների թվում էին։ Իրաք ժամանելուն պես դատական մարմինները մոտ 60 երկրներից կասկածյալների դեմ դատական գործընթաց սկսելուց առաջ սկսել են հարցաքննել կալանավորներին։
Նրանց թվում են 3543 սիրիացի, 467 իրաքցի և 710 կալանավորված այլ արաբական երկրներից: Կան նաև ավելի քան 980 օտարերկրացիներ, նրանց թվում՝ Եվրոպայից, Ասիայից, Ավստրալիայից և Միացյալ Նահանգներից։
Իսլամական Պետությունը տարածվել է Սիրիայում և Իրաքում 2014 թվականին՝ կատարելով զանգվածային սպանություններ և կանանց ու աղջիկներին հարկադրելով սեռական ստրկության: ԱՄՆ-ի գլխավորած ուժերի աջակցությամբ Իրաքը 2017 թվականին հայտարարեց երկրում Իսլամական Պետության նկատմամբ հաղթանակի մասին, իսկ քրդերի գլխավորած Սիրիայի դեմոկրատական ուժերը երկու տարի անց, ի վերջո, հաղթել են խմբավորմանը Սիրիայում։
Իրաքի դատարանները հարյուրավոր մահապատիժների և ցմահ ազատազրկման դատավճիռներ են կայացրել ահաբեկչական հանցագործությունների համար դատապարտված անձանց, ներառյալ՝ օտարերկրյա զինյալների:
