նախընտրելի դարձնելԻմ խորին համոզմամբ, և կարծում եմ՝ ձեզնից շատերը կիսում են այս տեսակետը, գլխավոր հարցը խաղաղության հաստատումն է։ Մեր ժողովուրդը խաղաղություն ու անվտանգություն է ուզում, և հենց սա հասկանալով՝ Հայաստանի ներկայիս իշխանությունները խաղաղությունը հռչակել են որպես իրենց գլխավոր կարգախոս։ Այս մասին այսօր՝ ապրիլի 18-ին, «Հայ ազգային կոնգրես» կուսակցության համագումարում հայտարարել է ՀԱԿ-ի վարչապետի թեկնածու Լևոն Զուրաբյանը։
Նա հիշեցրել է, որ Նիկոլ Փաշինյանը պնդում է, թե ինքն է խաղաղություն բերել Հայաստանին։
«Հիմա քննարկենք նրա փաստարկները։ Նիկոլ Փաշինյանը իրականում չորս փաստարկ է բերում։ Առաջինը՝ մեկուկես տարի կրակոցներ չեն եղել, ոչ ոք չի մահանում, մենք կարող ենք վայելել խաղաղությունը», - նշեց քաղաքական գործիչը։
Երկրորդ փաստարկը սահմանազատման հանձնաժողովի մասին արձանագրությունն է, որը հղում է կատարում 1991 թվականի Ալմա-Աթայի հռչակագրին, ասել է Զուրաբյանը։
«Այսինքն՝ այս սահմանազատման արձանագրությունն, ըստ էության, լուծում է Հայաստանի և Ադրբեջանի միջև 1991 թվականի սահմաններով սահմանազատման հարցը»։
Նրա երրորդ փաստարկը խաղաղության պայմանագրի ստորագրումն է։
Չորրորդ փաստարկն այն է, որ, համաձայն 2025 թվականի օգոստոսի 8-ի և 2026 թվականի հունվարի 14-ի այսպես կոչված TRIPP հուշագրերի, մենք թևակոխել ենք մի գործընթաց, որն արդեն իսկ մեզ տանում է դեպի երաշխավորված խաղաղություն։ Հինգերորդ փաստարկն այն է, որ բենզինն ու ցորենն արդեն իսկ մատակարարվում են Ադրբեջանի տարածքով»,- նշել է քաղաքական գործիչը։
Այս համատեքստում նա ընդգծել է, որ Նիկոլ Փաշինյանը պարզապես խաբում է մարդկանց՝ ասելով, թե ինքը խաղաղություն է հաստատել։
«Նախ, մեկուկես տարի կրակոցների բացակայությունը երբեք չի կարող համարվել խաղաղության ապացույց։
Ավելին, իր իշխանության ամբողջ ութ տարիների ընթացքում, ասենք՝ վեց տարվա ընթացքում, մենք փաստացի ունեցել ենք տասը բախում Ադրբեջանի հետ, երեք լայնածավալ զինված հակամարտություն՝ կարելի է նույնիսկ ասել երեք պատերազմ», - նշել է նա։
Լևոն Զուրաբյանի խոսքով՝ Փաշինյանը, որպես Հայաստանի անգործունակ և անգրագետ առաջնորդ, իսկ այժմ նաև որպես Ալիևի հնազանդ և խամաճիկ կուսակալ, պարզապես նվեր է Ալիևի համար։
«Ալիևը ընտրություններից առաջ ամեն ինչ անում է, որ այս «նվերը» վերընտրվի, թեկուզ միայն նրա համար, որ շարունակվի Հայաստանի դիմադրողականության անկման այս գործընթացը։ Սա, ուրեմն, ընդամենը նախընտրական զինադադար է, որի ընթացքում Ադրբեջանն ու Թուրքիան անթաքույց պահանջում են Հայաստանից ընտրել Նիկոլ Փաշինյանին», - ընդգծել է նա։
