Կիրակի օրը Հյուսիսային Կորեան մի քանի բալիստիկ հրթիռ է արձակել ծովի ուղղությամբ, հայտնել են նրա հարևանները։ Սա այս տարի Հյուսիսային Կորեայի կողմից զենքի վերջին փորձարկումն է, հայտնում է Associated Press-ը։

Հարավային Կորեայի շտաբների պետերի միացյալ կոմիտեն հայտնել է, որ արձակումները կատարվել են կիրակի առավոտյան Հյուսիսային Կորեայի արևելքում գտնվող Սինպո շրջանից։

Ըստ հայտարարության, Հարավային Կորեան ուժեղացրել է իր դիտարկման համակարգը և տեղեկատվության սերտ փոխանակում է իրականացնում ԱՄՆ-ի ու Ճապոնիայի հետ։ Հարավային Կորեայի նախագահի վարչակազմը հայտարարել է, որ Ազգային անվտանգության խորհուրդը ծրագրում է արտահերթ նիստ անցկացնել՝ հրթիռների արձակումը քննարկելու համար։

Ճապոնիայի պաշտպանության նախարարությունը նույնպես արձանագրել է արձակումները՝ հայտարարելով, որ հրթիռները, ըստ ենթադրության, ընկել են Հյուսիսային Կորեայի արևելյան ափամերձ ջրերը։

Ըստ գերատեսչության հաղորդագրության, Տոկիոն վճռական բողոք է հայտնել Փհենյանին՝ հայտարարելով, որ կիրակնօրյա արձակումները սպառնում են տարածաշրջանային ու միջազգային խաղաղությանը և խախտում են ՄԱԿ-ի Անվտանգության խորհրդի բանաձևերը, որոնք արգելում են Հյուսիսային Կորեայի ցանկացած բալիստիկ գործունեություն։