Քուվեյթի իշխանությունները ձերբակալել են ամերիկա-քուվեյթյան լրագրող Ահմեդ Շիհաբ Էլդինին, որին վեց շաբաթ շարունակ չէին տեսել, հայտնում է Al Jazeera-ն՝ վկայակոչելով լրատվամիջոցների նկատմամբ վերահսկողություն իրականացնող գործակալությանը։

41-ամյա լրագրող Շիհաբ Էլդինը, որն այցելել էր Քուվեյթում բնակվող իր ընտանիքին, մարտի 2-ից ի վեր համացանցում ոչինչ չի հրապարակել և հանրությանը չի երևացել, հայտնել է Նյու Յորքում տեղակայված Լրագրողների պաշտպանության կոմիտեն։

Կոմիտեն հայտնել է, որ նրան մեղադրանք է առաջադրվել կեղծ տեղեկատվություն տարածելու, ազգային անվտանգությանը վնաս հասցնելու և բջջային հեռախոսն անօրինական օգտագործելու համար։

Մարտի 15-ին Քուվեյթում օրենք է ընդունվել, որը նախատեսում է մինչև 10 տարվա ազատազրկում՝ ռազմական կառույցների մասին կեղծ լուրեր տարածելու համար՝ նպատակ ունենալով խաթարել վստահությունը նրանց նկատմամբ։

Պարսից ծոցի այլ երկրներում իշխանությունները հայտնել են հարյուրավոր մարդկանց ձերբակալությունների մասին, որոնք նկարահանել են հարձակումների վայրերը կամ համացանցում տարածել դրանց հետ կապված նյութեր։

Իրանը փետրվարի 28-ին իրականացված ամերիկա-իսրայելական հարվածներին պատասխանել է Պարսից ծոցի հարևան պետություններում ԱՄՆ ռազմական և էներգետիկ օբյեկտների վրա հարձակումներով։