ԱՄՆ նախագահ Դոնալդ Թրամփը կիրակի օրը ABC News հեռուստաալիքին պատմել է Իրանում տիրող իրավիճակի մասին և այն մասին, թե արդյո՞ք ինքը նախկինի պես հավատում է, որ կհասնի խաղաղության համաձայնագրի։

«Շատ լավ կլինի։ Նրանք կամ կանեն դա, կամ խնդիրներ կունենան։ Տեսնենք՝ ինչ կլինի»,- ասել է Թրամփը։

Հարցազրույցը հրապարակվել է շարունակվող բանակցությունների ֆոնին և Իրանի ափերի մոտ գտնվող նավագնացության կենսական երթուղու՝ Հորմուզի նեղուցի վերահսկողության վերաբերյալ շաբաթ օրը ԱՄՆ-ի և Իրանի արած հակասական հայտարարություններից հետո։ ԱՄՆ-ն շրջափակում է սահմանել, սակայն շաբաթ օրն Իրանը հայտարարել էր, որ իր ռազմածովային նավատորմն է վերահսկում նեղուցը։

Ըստ ծովային մոնիտորինգի գործակալության տվյալների, շաբաթ օրն Իրանը գնդակոծել է առնվազն երկու նավ։

«Նրանք պարտավորություն էին ստանձնել։ Նրանք արդեն խախտել են այն, քանի որ կրակոցներ են եղել։ Դա հրադադարի ռեժիմի խախտում է՝ շատ լուրջ խախտում։ Բայց դրանից հետո նրանք կրակ չեն բացել։ Տեսնենք՝ ինչ կլինի։ Ամեն ինչ լավ կլինի»,- հայտարարել է ԱՄՆ նախագահը։

Թրամփին, որի հանրային հայտարարությունները հնարավոր գործարքների մասին նախկինում տարբերվել են իրանցի առաջնորդների հայտարարություններից, հարցրել են նաև, թե արդյո՞ք նա նախկինի պես կկարողանա հասնել ԱՄՆ-ի և Իրանի միջև խաղաղության համաձայնագրի կնքմանը։

«Դա տեղի կունենա։ Այսպես թե այնպես։ Լավով, թե վատով։ Դա տեղի կունենա։ Կարող եք ինձ մեջբերել»,- հավելել է նա։