Գիտնականները Մյանմարում հայտնաբերել են փոսային իժի նոր տեսակ, որը արտաքին տեսքով նման է մի քանի հայտնի տեսակների։ Նրանք այն անվանել են Իրավադիի փոսային իժ (Trimeresurus ayeyarwadyensis): Այս մասին ապրիլի 21-ին հայտնել է Science Daily-ն։

Ուսումնասիրությունը կատարել են հերպետոլոգ դոկտոր Չան Կին Օննը և նրա գործընկերները Կենսաբազմազանության ինստիտուտից և Կանզասի համալսարանի Բնական պատմության թանգարանից։ Նրանք ուսումնասիրել են օձերի պոպուլյացիան կենտրոնական Մյանմայում՝ Պաթեյն և Յանգոն գետերի միջև ընկած տարածքում։

Սկզբում այս օձերը շփոթվել են երկու տարբեր տեսակների հնարավոր հիբրիդների հետ՝ իրենց անսովոր գունային երանգի պատճառով։ Սակայն գենետիկական վերլուծությունը ցույց է տվել, որ դրանք առանձին, նախկինում չնկարագրված տեսակ են։ Սակայն տեսակի ներսում կա զգալի բազմազանություն. որոշ անհատներ վառ կանաչ են՝ առանց բծերի, իսկ մյուսները՝ մուգ կանաչ՝ տարբեր նշաններով։

Գիտնականները նշել են, որ ասիական փոսային իժերի խումբը շատ դժվար է դասակարգել, քանի որ տարբեր տեսակները կարող են գրեթե նույնական լինել արտաքին տեսքով կամ, ընդհակառակը, շատ տարբեր՝ մնալով ազգակից։

Նոր տեսակը անվանակոչվել է Իրավադի գետի անունով, որը Մյանմայի ամենամեծ գետն է։ Հետազոտողների խոսքով՝ արդյունքները նաև հաստատում են նախկինում կատարված գենետիկական ուսումնասիրությունները, որոնք ցույց էին տալիս օձերի այս խմբի ներսում թաքնված բազմազանություն և անցյալում տեսակների միջև գեների հնարավոր հոսք։