ՆախընտրելիՃապոնիայում 16 հազար մոմ են վառել ի հիշատակ 2011թ. աղետալի երկրաշարժի եւ ցունամիի զոհերի: Մոմերը վառվել են մարտի 10-ին Օսակայի բուդդայական Սիտենոձի տաճարում:
Ինչպես «Կիոդո» գործակալությանը հղում անելով հաղորդում է Lenta.ru-ն, զոհերի եւ անհետ կորածների հիշատակին կատարվող սգո արարողությունների մեծամասնությունը տեղի կունենա մարտի 11-ին` աղետի տարելիցի օրը:
Տեղական ժամանակով 14:46-ին նշանակված է լռության րոպե: Հենց այդ ժամին 2011թ. մարտի 11-ին Ճապոնիայում տեղի էր ունեցել 9 մագնիտուդ հզորությամբ ավերիչ երկրաշարժը, որիին հաջորդել էր ցունամին` մինչեւ 10 մ բարձրությամբ ալիքներով:
Լռության րոպե կհայտարարվի նաեւ «Ֆուկուսիմա-1» ատոմակայանում, որտեղ երկրաշարժի արդյունքում մի շարք վթարներ էին տեղի ունեցել, ինչի հետեւանքով տարածքը ռադիոակտիվ վարակման էր ենթարկվել: Մարտի 11-ին ԱԷԿ-ի օպերատոր ընկերություն Տերսոն կրկին հրապարակավ ներողություն կխնդրի կայանի վթարների համար:
Ճապոնիայի կայսր Ակիհիտոն եւ երկրի վարչապետ Եսիհիկո Նոդան ներկա կգտնվեն Տոկիոյի ազգային թատրոնում կայանալիք սգո արարողությանը:
2011թ. հզորագույն երկրաշարժի արդյունքում զոհվել կամ անհետ կորել է շուրջ 19 հազար մարդ, փլվել է շուրջ 330 հազար շինություն:
