Սաուդյան Արաբիայում ոստիկանությունը կոպտորեն ցրել է  Աբնեում Խալիդ թագավորի համալսարանի ուսանողուհիների ցույցը:

Վնասվածքներ է ստացել առնվազն 50 մարդ, ուսանողուհիներից մեկն էլ, ըստ ոչ հաստատված տեղեկության, մահացել է:

Ուսանողուհիները բողոքի ցույց են կազմակերպել բուհի աշխատակազմի այն որոշման դեմ, որ հանրակացարանում մաքրություն եւ կարգուկանոն պետք է պահպանեն հենց ուսանողուհիները, այլ ոչ թե` հավաքարարները:  Ուսանողուհիները տարածքի մաքրման պարտականությունների` իրենց վրա դնելը գնահատում են որպես հասարակության հայրիշխանական համակարգի հերթական դրսեւորում, հայտնում է NEWSru.co.il-ը:

Մահակներով զինված ոստիկանությունը ներխուժել է ուսանողական քաղաքի տարածք, սկսել է ծեծել ցուցարարներին եւ  նրանց վրա կրակմարիչներով փրփուր լցնել:

Դրանից հետո համալսարան է այցելել Ասիր նահանգի նահանգապետ արքայազն Ֆայսալ բին Խալիդը: Նա հայտարարել է, որ ուսանողուհիների գործողություններն սպառնում են երկրի անվտանգությանը, եւ նշել, որ Սաուդյան Արաբիայում տեղ չկա ելույթների եւ ցույցերի համար:

Նշենք, որ Սաուդյան Արաբիայում որոշել են, որ կանանց արգելվում է նստել ղեկին, քանի որ դա կարող է հանգեցնել երկրում նույնասեռականության եւ մարմնավաճառության աճին: