նախընտրելի դարձնելՀայաստանի ազգային պատկերասրահը եւ «Կոսմոպոլիտան Հայաստան» ամսագիրը համատեղ կազմակերպել են «Նորաձեւությունը արվեստում» պայմանական խորագիրը կրող ցուցահանդեսը, որը կտեւի մեկ ամիս:
Այն նաեւ դիմանկարի մի ինքնատիպ ցուցադրություն է, ուր հիմնականում տեղ են գտել վրձնի մեծ վարպետների կերտած կանանց կերպարները:
Ցուցահանդեսի նպատակն է հանրությանը ներկայացնել անցյալի հայ իրականության մեջ ընդունված հագուստը, ուստի ընտրված են 19-րդ դարի վերջի եւ 20-րդ դարի արվեստագետների` Վարդգես Սուրենյանցի, Ալեքսանդր Բաժբեուկ-Մելիքյանի, Երվանդ Քոչարի, Պետրոս Կոնտուրաջյանի, Մինաս Ավետիսյանի, Փարավոն Միրզոյանի եւ այլոց ստեղծագործություններ, որոնցում հանդիսատեսը կտեսնի տարբեր ժամանակահատվածներին եւ հասարակության տարբեր խավերին հատուկ հանդերձանքներ:
Բացի գեղարվեստական բարձր արժեքից, այս ստեղծագործությունները ներկայացնում են նաեւ փաստա-վավերագրական արժեք:
Ցուցադրությունում տեղ գտած նկարների միջոցով հանդիսատեսը պատկերացում կկազմի տարբեր կերպարների մասին եւ կծանոթանա նրանց հատուկ հագնվելու ձեւի ու ոճերի հետ:
Իրենց հանդերձանքով, ատրիբուտներով տարբերվող այս կերպարների մեծամասնությունն այսօր մեզ համար այլեւս պատմություն են:
Փորձ է արված անցյալ ժամանակահատվածներին բնորոշ հանդերձանք պատկերող ստեղծագործություններին համադրել ներկա իրականությանը բնորոշ հանդերձանք, որն իր գույներով, դետալներով եւ այլ ատրիբուտներով միտված է ներկայացնելու անցյալի հագուստի այսօրվա համարժեք տարբերակը:
Ի դեպ, ցուցահանդեսի օրերին նախատեսվում են արվեստին եւ նորաձեւությանը վերաբերող քննարկումներ:
