ԱՄՆ Ներկայացուցիչների պալատի հայկական խմբի համանախագահ Ֆրենք Փալոնը ձգտում է ստանալ իր գործընկերների աջակցությունը, որ 2013 ֆինանսական տարում ավելացվի Հայաստանի օգնությունը, Լեռնային Ղարաբաղի օգնության ծավալը, նպատակային հատկացումների հասնել Ջավախքի համար, եւ ֆինանսավորել Մերձավոր Արեւելքից տեղահանված հայերին: Այդ մասին հաղորդում է Ամերիկայի հայ դատի հանձնախումբը:

Նյու Ջերսիից ընտրված օրենսդիրը նամակ է տարածել ստորագրման համար, որը այնուհետ ուղղվելու է Ներկայացուցիչների պալատի հատկացումների կոմիտեի պետական եւ օտարերկրյա գործառնությունների ենթահանձնաժողովին: Նամակում մասնավորապես խնդրվում է.

-Առվազն 5 մլն դոլար ամերիկյան օգնություն Լեռնային Ղարաբաղին.

-Վրաստանին հատկացվող օգնության առնվազն 10 տոկոս ուղղել Սամցխե-Ջավախքում աշխատատեղերի ավելացմանը.

-Առնվազն 50 մլն դոլար օգնություն Հայաստանին.

-Մերձավոր Արեւելքից հայ տեղահանվածներին օգնելու համար.

-907 հոդվածի սահմանափակումների ուժեղացում Ադրբեջանի նկատմամբ.

-Լեռնային Ղարաբաղի ներկայացուցիչների հետ շփումների խոչընդոտների վերացում.

-ԵԱՀԿ Մինսկի խմբի համանախագահների բանակցություններում Լեռնային Ղարաբաղի առաջնորդների մասնակցության կոչ: