ՆախընտրելիՍիդնեյի 34-ամյա բնակիչ Դեւիդ Տարասենկոն դարձել է նոր iPad պլանշետային համակարգչի առաջին գնորդն Ավստրալիայում, որտեղ բոլորից շուտ է սկսվել սարքի պաշտոնական վաճառքը:
Apple-ը մարտի 16-ին սկսում է երրորդ սերնդի պլանշետային iPad համակարգչի վաճառքը: Բոլոր խանութները պետք է բացվեն տեղական ժամանակով առավոտյան 8-ին: Սակայն Ավստրալիայում նոր սարքերն առաջինն է սկսել վաճառել ոչ թե պաշտոնական Apple Store-ը, այլ կապի տեղական օպերատոր Telstra-ն, որն սկսել է նոր iPad-ի իրացումն իր գրասենյակներում անմիջապես կեսգիշերն անց` չսպասելով Apple-ի խանութների բացմանը, հայտնում է Reuters-ը:
Անմիջապես կեսգիշերն անց կսկսեն վաճառել նաեւ նոր iPad-ն ԱՄՆ-ում` Wal-Mart-ի եւ Best Buy-ի առանձին խանութներում, հայտնում է Mashable-ը: Բացի դրանից Նյու Յորքի բնակիչները կեսգիշերից հետո կարող են սարքը գնել Յունիոն հրապարակի Best Buy-ի շուրջօրյա խանութում:
Ինչպես հայտնում է «Վզգլյադը», պլանշետի հերթն արդեն դարձել է յուրօրինակ բիզնես. այսպես, Նյու Յորքի Հինգերորդ ծառուղում գտնվող Apple-ի խանութի մոտ ահագին հերթ է գոյացել, որտեղ երրորդ տեղը վաճառվում է 1,5 հազար դոլարով:
Հերթում առաջինը ճանապարհային նախկին աշխատող Գրեգ Փեքերն է, որն իր տեղն զբաղեցրել է երկուշաբթի օրը: Մինչեւ վաճառքի սկսվելը 12 ժամ առաջ Apple-ի խանութի մոտ հերթն արդեն կազմում է 100 մարդ: Բոլոր այդ մարդիկ մտադիր են գիշերն անցկացնել փողոցում: Նրանք հիմնավորապես պատրաստվել են, ինչ-որ մեկը վերմակներով է ծածկվել, տեղավորվելով տնից բերված բազկաթոռներին, իսկ ուրիշն էլ` քնապարկերում:
Լոնդոնում Apple Store-ի խոշորագույն խանութներից մեկում հերթում նոր iPad-ի համար չորրորդ տեղը հանվել է օնլայն-աճուրդի eBay-ում: Օգտվողներն արդեն 13 խաղադրույք են արել, իսկ տեղի գինը հասել է մինչեւ 76 ֆունտի:
