Հայաստանում 2010-11թթ. բենզին ներկրողների հարկային մուտքերը նվազել են 12,5%-ով: Այս մասին NEWS.am-ի թղթակցին հայտնեցին Պետական եկամուտների կոմիտեի մամուլի ծառայությունից:

Հիշեցնենք, որ 2011թ. հունվարից բենզինը  եւ դիզվառելիքը հարկվում են ոչ թե  հաստատագրված վճարով, այլ ԱԱՀ-ով: Նախկինում 1 տոննա բենզինի համար ներկրման տուրքը կազմում էր  112 դրամ, դիզվառելիքինը` 32,5 հազար: Անցումը ԱԱՀ-ի պայմանավարված էր  հարկային մուտքերի հավաքագրման ավելացման վերաբերյալ ԱՄՀ խորհրդատվությամբ:

Միաժամանակ, եթե 2010թ. բենզին ներկրողների հարկային վճարների ընդհանուր ծավալը կազմում էր մոտ  21,1 մլրդ դրամ, ապա  2011թ-ին` 18,5 մլրդ դրամ, որից  ԱԱՀ-ն 14,1 մլրդ,  իսկ ակցիզային հարկը`  4,4 մլրդ դրամ:

Ինչպես հայտնել են ՊԵԿ-ից,  դա պայմանավորված է բենզիների եւ դիզվառելքի ներկրման ծավալների նվազմամբ:

Հիշեցնենք, որ հանրապետությունում բենզինի եւ դիզվառելիքի խոշոր ներմուծողներից են «Ֆլեշ» եւ «CPS» ընկերությունները: 2011թ-ին ներմուծվել է 371,5 մլն դոլարի 358 հազ տոննա նավթամթերք: Իսկ 2010թ-ին` ծավալով 5,8%-ով ավելի, բայց արժեքով 18% պակաս: