նախընտրելի դարձնելԲրիտանական Մեծ Մանչեսթր կոմսության Ուիգան քաղաքում դեռահասները պաշարել են «McDonald`s»-ի ցանցը: Ներխուժելով ներս` երիտասարդներն սկսել են վիրավորական արտահայտություններ անել անձնակազմի հասցեին, նրանք սկսել են գողանալ ուտելիքը, իսկ մյուսներն էլ այդ ամենը նկարահանել են տեսախցիկով:
Ինչպես հաղորդում է «The Daily Mail»-ը, հարձակման մասին տեսահոլովակը մի քանի օր առաջ հայտնվել է YouTube-ում, այն արդեն դիտվել է գրեթե 100 հազ. անգամ:
Ոստիկանության տվյալներով` սովահար գնորդների «խռովությունը» տեղի է ունեցել ապրիլի 10-ին, ժամը 22:30-ին: Մոտ հարյուր երիտասարդներ ներխուժել են «McDonald`s» եւ, շփոթեցնելով այցելուներին, սկսել են կատարել Ուիգանի փողոցային հիմնը:
Սկզբում անձնակազմը փորձել է շարունակել սպասարկել մյուս այցելուներին, սակայն հետո ստիպված են եղել սեղմել տագնապի ազդանշանը եւ ոստիկանություն կանչել: Մեծ Բրիտանիայի իշխանությունները մտադիր են պարզել հրահրողներին եւ պատասխանատվության ենթարկել նրանց:
