նախընտրելի դարձնելՆիկո՛լ, դու մեր ժողովրդին պետք ես ողջ և առողջ, դրա համար դադարեցրո՛ւ նոր թատերական ներկայացումներ բեմադրել. դու հանրությանը պետք ես ողջ, որպեսզի դատարաններում մանրամասն պատմես, թե ինչու հանձնեցիր Արցախը և դարձար շուրջ 5000 մարդու մահվան պատճառ։ Այս մասին մայիսի 18-ին «Facebook»-ի իր էջում հրապարակված տեսաուղերձում հայտարարել է ՀՅԴ Գերագույն մարմնի ներկայացուցիչ, «Հայաստան» դաշինքի պատգամավորության թեկնածուների համամասնական ցուցակի երկրորդ համարը զբաղեցնող Իշխան Սաղաթելյանը։
Քաղաքական գործիչը խստորեն քննադատել է գործող վարչապետի գործողությունները, ով, նրա խոսքով, վաղ առավոտից տարածում է դիմակավորված անձանց մասնակցությամբ ինչ-որ տեսանյութ, որոնք իբր սպառնում են իրեն հաշվեհարդարով։ Առիթը համացանցում տարածված տեսանյութն էր, որտեղ մի քանի զինված ու դիմակավորված անձինք ղարաբաղյան բարբառով հաշվեհարդարի սպառնալիքներ են հնչեցնում Նիկոլ Փաշինյանի հասցեին։ Ինքը՝ Փաշինյանը, Երևանի Արաբկիր վարչական շրջանում նախընտրական քարոզարշավի ժամանակ կոշտ է արձագանքել այդ տեսահոլովակին՝ հեղինակներին անվանելով «լակոտներ» և խոստանալով հատ-հատ գտնել ու սատկանել նրանց, եթե կամավոր չներկայանան Ոստիկանություն։
Սաղաթելյանն ընդգծել է, որ այս տեսանյութը մեծ հավանականությամբ բեմադրված է հենց իշխանության կողմից, որպեսզի Փաշինյանը կարողանա դուրս գալ փողոցներ և աջ ու ձախ սպառնալիքներ հնչեցնել՝ ընդդիմությանն անհիմն կերպով մեղադրելով նման ակցիաներ պատվիրելու մեջ։ Ինչպես նշել է ընդդիմադիր գործիչը, ռեժիմի այս ձեռագիրը վաղուց բացահայտված է և կրկնվում է ամեն անգամ, երբ իշխանությունը հայտնվում է փակուղում՝ լինի դա պատերազմից հետո, Դիմադրության շարժման, թե «Սրբազան պայքարի» ժամանակ։
Իշխան Սաղաթելյանն ընդգծել է, որ այս բեմադրությունների իրական նպատակը քաղաքացիների շրջանում վախ սերմանելը և ընդդիմության նկատմամբ սպասվող ապօրինի գործողությունները, բռնություններն ու ձերբակալությունները, ինչպես նաև երկրի սահմանադրական կարգի հետագա տապալումն արդարացնելն է։ «Քեզ ոչ ոք վատը չի ցանկանում, դու պարզապես պարտավոր ես կանգնել օրենքի առաջ և տալ մեր պետության դեմ ուղղված այս դավաճանության քո հանցակիցների անունները»,- ընդգծել է պատգամավորը՝ ուղղակիորեն դիմելով Փաշինյանին։
Նա հավելել է, որ ժողովրդին վախեցած ներկայացնելու և նախապատրաստվող մահափորձերի մասին հերթական աղմուկը բարձրացնելու փորձերն այլևս ազդեցություն չեն թողնի։ «Հայաստան» դաշինքի ներկայացուցչի կարծիքով՝ վարչապետի ներկայիս հիստերիան պայմանավորված է այն բանով, որ նա արդեն ծանոթացել է նոր սոցիոլոգիական հարցումներին և գիտակցել իր իշխանության վախճանի մոտալուտ լինելը։ Այս համատեքստում Սաղաթելյանը հեգնել է առողջապահության նախարար Անահիտ Ավանեսյանին՝ նշելով, որ փողոցներում պարելու փոխարեն նա պետք է զբաղվեր գործադիր իշխանության ղեկավարի հոգեկան առողջությամբ և հստակեցներ անհրաժեշտ դեղամիջոցների չափաբաժինը։
Ընդդիմադիր գործիչն ընդգծել է, որ այս ընտրությունները քաոսի վերածելու իշխանությունների ցանկացած փորձ խստորեն կկասեցվի։ Ավարտելով իր ուղերձը՝ Իշխան Սաղաթելյանը հայ ժողովրդին կոչ է արել կամք ու համբերություն դրսևորել։ Նա նշել է, որ գործող ղեկավարության խուճապային պահվածքն ու ակնհայտ հուսահատությունը լավագույն ապացույցն են այն բանի, որ երկրում քաղաքական գործընթացներն ի վերջո շարժվում են ճիշտ ուղղությամբ։ Նա հավելել է, որ արդարության վերականգնման պահը մոտենում է։
