Շատ կարևոր եմ համարում, որ, անկախ այս կամ այն քաղաքական դիրքորոշումից, մենք բոլորս շարունակենք ապահովել Հայաստանի գործող օրենսդրության պահանջները։ Այս մասին NEWS.am-ի թղթակցի հետ զրույցում, իշխող «Քաղաքացիական պայմանագիր» կուսակցության քարոզարշավի ժամանակ, մայիսի 25-ին Գյումրիում հայտարարել է ՀՀ կրթության, գիտության, մշակույթի և սպորտի նախարար Ժաննա Անդրեասյանը՝ պատասխանելով Արագածոտնի և Լոռու մարզերում իշխող ուժի քարոզարշավին ուսուցիչների ու դպրոցականների ներգրավման մասին հարցին։

Նրա խոսքով՝ քաղաքացիները պետք է իրենց քաղաքական դիրքորոշումն արտահայտեն ու ցուցադրեն դա բացառապես գործող օրենսդրության շրջանակներում։ «Մարդիկ իսկապես ակտիվություն են ցուցաբերում, ընդ որում՝ անկախ իրենց գործունեության տեսակից»,- ասել է նախարարը՝ քաղաքացիներին հորդորելով նման ակտիվություն դրսևորել բացառապես գործող կարգավորումների և նորմերի շրջանակներում։

Անդրեասյանի նշմամբ՝ դա հիմնականում վերաբերում է դպրոցների տնօրեններին։ «Հետևաբար, բոլոր նման քայլերն ու գործողությունները պետք է հետևանքներ ունենան։ Եվ կարծում եմ, որ տվյալ դեպքում հենց այդպես էլ կա»,- ընդգծել է Անդրեասյանը։