նախընտրելի դարձնել«Հայաստանում կլինի առաջնորդ, որը երբեք դա թույլ չի տա, Փաշինյանի և Ալիևի ծրագիրը փոշի կդառնա»։ Հունիսի 3-ին Հանրապետության հրապարակում անցկացված նախընտրական հանրահավաքի ժամանակ այդ մասին հայտարարել է «Ուժեղ Հայաստան» կուսակցությունների դաշինքի պատգամավորության թեկնածուների համամասնական ցուցակը գլխավորող Նարեկ Կարապետյանը։
Իր ելույթի ընթացքում Նարեկ Կարապետյանը հանրահավաքի մասնակիցներին ցույց է տվել մի փաստաթուղթ, որը համառոտ քաղվածք է պաշտոնական Բաքվի հրատարակած այսպես կոչված «Արևմտյան Ադրբեջան վերադարձի» պետական հայեցակարգից, և ընդգծել է, որ դա ադրբեջանական պետության կողմից ֆինանսավորվող քաղաքականություն է՝ ուղղված Հայաստանում ժողովրդագրական իրավիճակի փոփոխմանը։ Նա մեջբերել է այդ ծրագրի դրույթները, ըստ որոնց՝ ներկայիս հանրապետության տարածքում իբր «ամենուր ոչնչացվել է ադրբեջանական պատմամշակութային ժառանգությունը», իսկ ադրբեջանցիների իրավունքների վերականգնումն ու վերադարձը, ներառյալ մզկիթների ու գերեզմանատների վերականգնումը, հայտարարվում է Բաքվի առաջնահերթություն։
Կարապետյանը վրդովմունք է հայտնել, որ հուշարձանների ոչնչացման մասին հայտարարում է մի ազգ, որը էթնիկ զտման է ենթարկել Լեռնային Ղարաբաղի հայերին, ջնջել այնտեղի բոլոր հայկական հետքերը և ոչնչացրել Նախիջևանի խաչքարերը։ Նրա խոսքով՝ 15 օր անց՝ Հայաստանում ընտրություններից ընդամենը 11 օր հետո, Իլհամ Ալիևը Մեղրիից 10 կիլոմետր հեռավորության վրա գտնվող Նախիջևանում կազմակերպելու է այդ «վերադարձին» նվիրված ֆորում։ Ընդ որում, Ադրբեջանի նախագահը դեռ երեք ամիս առաջ ուղիղ հայտարարում էր, որ ադրբեջանցիները պետք է իրենց «պատմական հողեր» վերադառնան ոչ թե տանկերով, այլ ավտոմեքենաներով, իսկ Բաքվի հոգևոր առաջնորդը խոսում էր Հայաստանում 400 մզկիթ վերականգնելու անհրաժեշտության մասին։
Ինչպես նշել է Նարեկ Կարապետյանը, Հայաստանի գործող իշխանության ծրագիրը ամբողջությամբ համաժամեցված է Բաքվի պահանջների հետ, քանի որ ՀՀ Ազգային ժողովի նախագահ Ալեն Սիմոնյանն արդեն հայտարարում է, թե հայերն ու ադրբեջանցիները պետք է սովորեն միասին ապրել, և չի բացառում նրանց տեղափոխությունը Հանրապետություն։ Բացի դրանից, Հայաստանի աշխատանքի և սոցիալական հարցերի նախարարը խորհրդարանի ամբիոնից բացահայտ խոսում է այն մասին, որ քաղաքացիները պետք է համակերպվեն օտարերկրացիների գալստյան հետ, որոնք քաղաքացիություն են ստանալու։
Նա նշել է, որ սա նաև ընտրություն է՝ հանուն լավ կյանքի հայրենիքը լքող քաղաքացիների արտագաղթի շարունակման և ավերված երկիրը վերականգնելու, տնտեսությունն ամրապնդելու ու յուրաքանչյուր հայ ընտանիքին բարեկեցություն բերելու հնարավորության միջև՝ այնպես անելով, որ հայերն այլևս չհեռանան։
«Ինձ համար մեծ պատիվ էր լինել Հայաստանի համար այս նշանակալից, պատմական պայքարի մի մասնիկը, կրել դրա բոլոր դժվարությունները և կանգնել ձեր առջև մաքուր խղճով»,- հավելել է Կարապետյանը։
Նա ընտրողներին կոչ է արել մնացած չորս օրերին համախմբել իրենց շրջապատը և անպայման գնալ ընտրական տեղամասեր։ «Գնացե՛ք ընտրությունների, որպեսզի նրանք չգան»,- եզրափակել է նա։
