Նախընտրելի«Սա հարյուր տոկոսանոց սուտ է, մենք նույնիսկ Հայաստանի քաղաքացի չենք և ֆիզիկապես չէինք կարող մասնակցել քվեարկությանը, Գևորգի կողմից ընտրակաշառքի մասին խոսք անգամ լինել չի կարող»։ Հունիսի 22-ին Հակակոռուպցիոն դատարանի շենքի մոտ լրագրողների հետ զրույցում այդ մասին հայտարարել են Արցախից բռնի տեղահանված քաղաքացիները, որոնք հավաքվել էին ի պաշտպանություն բարեգործական ծրագրերի համակարգող Գևորգ Խամոյանի։
Մարդիկ համերաշխության ակցիայի էին դուրս եկել ի պատասխան այն քրեական վարույթի, որի շրջանակում «Ուժեղ Հայաստան» կուսակցության կողմնակից Խամոյանը մեղադրվում է նրանում, որ ընտրությունների շրջանում այլ անձանց հետ միասին ընտրողներին կովեր, հավեր և այլ կենդանիներ է բաժանել՝ իբր խախտելով բարեգործության օրենսդրական արգելքը։ Դատարանի մոտ հավաքված ծրագրերի շահառուները միաձայն ընդգծել են, որ Խամոյանի գործողություններում երբեք որևէ քաղաքական ենթատեքստ չի եղել, իսկ օգնությունն ինքնին տրամադրվել է ընտրական գործընթացից դեռ շատ առաջ։ Ակցիայի մասնակիցների խոսքով՝ իրենք ինքնուրույն են դիմել բարերարին՝ սոցիալական ծանր վիճակի պատճառով, որից հետո իրենց այցելել են տնտեսության պահման պայմաններին ծանոթանալու համար և առանց որևէ քաղաքական պայմանի անասուն ու թռչուն են հատկացրել։
«Մենք եկել ենք Օշականից, որպեսզի վերականգնենք արդարությունը, չէ՞ որ Գևորգը մեր ընտանիքին և շատ հարևանների օգնել է դեռևս 2025 թվականի ապրիլին՝ հատկացնելով շուրջ 50 ածան հավ, իսկ բուն ընտրությունների մասին մենք իմացել ենք միայն երեկ՝ նրա ձերբակալության մասին լուրերից»,- պատմել է ակցիայի մասնակիցներից մեկը՝ նշելով, որ իր ազգականներին ևս Խամոյանն օգնել է խոզեր ձեռք բերել տնտեսություն վարելու համար։
Այդ դիրքորոշմանը համամիտ էր Շուշիից մեկ այլ տեղահանված՝ առաջին կարգի հաշմանդամ Աշոտ Միգլայանը, որն այժմ բնակվում է Օշական գյուղում։ Նա ընդգծել է, որ անձամբ է զանգահարել Խամոյանին՝ աջակցության խնդրանքով, ինչից հետո ծրագրի համակարգողն այցելել է, ծանոթացել բժշկական փաստաթղթերին և ընտանիքին 65 հավ հատկացրել։ Միգլայանը հավելել է, որ դատարանի շենքի մոտ է եկել՝ չնայած ֆիզիկական ծանր վիճակին, քանի որ իր պարտքն է համարում պաշտպանել իր հանդեպ կարեկցանք ցուցաբերած մարդու անվան պատիվը։ Նա նշել է, որ օգնության տրամադրման ընթացքում քաղաքականության կամ կուսակցությունների մասին ոչ մի բառ չի հնչել։
«Մենք կատարյալ շոկի մեջ ենք կատարվածից, չէ՞ որ Գևորգը մեզ այցելում էր, հետաքրքրվում երեխաների թվով և 50 հավ հատկացրեց այն խոսքերով, որ փոքրիկները միշտ տնական ձու և սնունդ ունենան»,- կիսվել է բողոքի ցույցի ևս մեկ մասնակից՝ Դավիթ Գասպարյանը։
Նա հաստատել է, որ օգնության բաշխումը տեղի է ունեցել դեռևս 2024 թվականին, երբ իրենց շրջապատում ոչ ոք չէր էլ կարող ենթադրել, որ 2026 թվականին խորհրդարանական ընտրություններ են անցկացվելու։
Նշենք, որ բարերար Ալեքսանդր Սարգսյանի գլխավորած «Միացեք, հայեր» նախաձեռնությունն աջակցություն է ցուցաբերել ոչ միայն առանձին ընտանիքների, այլև պետական ու հասարակական նշանակության կառույցների։ Նախաձեռնության միջոցով տարբեր ժամանակահատվածներում օգնություն է տրամադրվել Հայաստանի բանակին, ԶՈՒ ստորաբաժանումներին, պատերազմից տուժած ընտանիքներին, զոհված ու վիրավոր զինծառայողների հարազատներին, ինչպես նաև բազմաթիվ սոցիալական ծրագրերի շրջանակում։ 2023 թվականից նախաձեռնությունը մեկնարկել է նոր ծրագիր՝ աջակցություն ցուցաբերելով Արցախից բռնի տեղահանված գյուղական ընտանիքներին։ Նրանց տրամադրվել են կովեր, ոչխարներ, խոզեր, հավեր և տնտեսություն վարելու տարբեր միջոցներ։ Այդ ծրագրի իրականացումը համակարգում էր հենց Գևորգ Խամոյանը, որը նաև պարբերաբար տեսահաշվետվություններ էր ներկայացնում բարերարներին՝ ցուցադրելով տրամադրված օգնությունն ու շահառուներին։
