նախընտրելի դարձնելՄենք կանգնած ենք այստեղ արևի տակ, հանուն մեր ընտանիքների, սակայն մինչ այժմ պաշտոնյաներից ոչ ոք չի եկել և պատասխանել, թե ինչպես պետք է հիմա մարենք վարկերը և վճարենք կոմունալ ծառայությունների համար՝ առանց աշխատավարձ ստանալու։ Այս մասին հուլիսի 17-ին շարունակվող բողոքի ակցիայի ընթացքում հայտնել են «Մուլտի Սթոուն» քարամշակման գործարանի աշխատակիցները։
Նրանց խոսքով՝ պետական կալանքի պատճառով ձեռնարկության հարկադիր պարապուրդը հարյուրավոր ընտանիքների թողել է առանց ապրուստի միջոցների՝ լիակատար անորոշության պայմաններում։ «Այսօր արդեն 17-ն է, մեզանից ոչ ոք աշխատավարձ չի ստացել, բոլորը վարկեր ունեն, իսկ բանկերին չի հետաքրքրում՝ հիմա աշխատո՞ւմ ենք, թե՞ ոչ», — վրդովված նշել են նրանք։ Բողոքի ակցիայի մասնակիցներն ընդգծել են, որ գործարանի ապագան և բոլոր սոցիալական հարցերի լուծումը կապում են բացառապես կոնցեռնի հիմնադիր Գագիկ Ծառուկյանի վերադարձի հետ։
Հիշեցնենք, որ «Բարգավաճ Հայաստան» կուսակցության առաջնորդ Գագիկ Ծառուկյանին պատկանող ձեռնարկություններում և նրա առանձնատանը լայնածավալ խուզարկությունները սկսվել էին հուլիսի 6-ին, ինչից հետո նա ձերբակալվել և կալանավորվել է 2022-2024 թվականներին կատարված խարդախության և փողերի լվացման գործով։
