նախընտրելի դարձնելՀայաստանում և նրա սահմաններից դուրս չկա ոչ մի միամիտ մարդ, ով կհամարեր, թե Սահմանադրության շուրջ ընթացող ներկայիս քննարկումները օրակարգ են, որն առաջացել է հենց երկրի ներսում։ Այս մասին, այսօր՝ օգոստոսի 12–ին, ԱԺ նիստում, պետաիրավական հարցերի մշտական հանձնաժողովի նախագահի ընտրության հարցի քննարկման ժամանակ հայտարարեց ընդդիմադիր «Հայաստան» խմբակցության ղեկավար Աննա Գրիգորյանը։
Նրա խոսքով՝ այն, ինչ այսօր քննարկվում է ըստ էության, որևէ առնչություն չունի 2020 թվականի սահմանադրական փոփոխությունների բովանդակության հետ։
«Այսօր Սահմանադրության հարցը գտնվում է բացառապես մեկ հարթության մեջ՝ պետք է արդյոք հանե՞նք Անկախության հռչակագրին հղումը, թե՞ ոչ։ Պետք է իրերը կոչել իրենց անուններով. գոյություն ունեն Ադրբեջանի նախապայմանները։ Այդպիսի պայմանները երկուսն էին։ Առաջինը՝ ԵԱՀԿ Մինսկի խմբի համանախագահության ինստիտուտի լուծարումն էր, ինչը իրականացվեց համաձայնագրի նախաստորագրման փուլում։ Երկրորդ պահանջը Հայաստանի Հանրապետության Սահմանադրության մեջ այնպիսի փոփոխությունների կատարումն է, որոնք դրանից կբացառեն Անկախության հռչակագրին հղումը», - արձանագրեց Գրիգորյանը։
Պատգամավորի կարծիքով՝ Հայաստանը այսպես կոչված «Արևմտյան Ադրբեջան» դարձնելու առաջին փուլը հենց Սահմանադրության փոփոխությունն է։
«Այս խորհրդարանը կարող է հաստատել Սահմանադրության նոր տեքստը և այն հանրաքվեի դնել միայն անհրաժեշտ մեծամասնության առկայության դեպքում։ Բայց դուք այդպիսի մեծամասնություն չունեք։ Ոչ ոք մեզ չի լիազորել իրականացնել նման փոփոխություններ։ Ավելին, եթե ցանկանում եք, ընտրությունների արդյունքներով ուժերի ներկայիս հարաբերակցությունը, իր բոլոր խնդրահարույց կողմերով հանդերձ, փրկօղակ է թե՛ ձեզ, թե՛ Փաշինյանի համար։ Փրկօղակ, որը թույլ է տալիս չգնալ հերթական նվաստացուցիչ զիջմանը։ Դրանից հետո կհետևեն նոր պահանջներ և նոր զիջումներ», - ընդգծեց Աննա Գրիգորյանը՝ դիմելով իշխող ՔՊ խմբակցությանը։
