ՆախընտրելիԵրկիրը չեն կառավարում վրեժխնդրության զգացումից ելնելով։ Այդ մասին այսօր՝ օգոստոսի 25-ին Ազգային ժողովի նիստում՝ Կառավարության հնգամյա ծրագրի քննարկման ժամանակ, հայտարարել է ընդդիմադիր «Հայաստան» դաշինքի պատգամավոր Աղվան Վարդանյանը։
Նրա խոսքով՝ նման երկիրը ապագա չունի։
«Ապագա չունի նաև այն ղեկավարը, որը առաջնորդվում է վրեժխնդրությամբ։ Սկզբունքներից, խղճից և համոզմունքներից զուրկ մարդկանց իշխանությունը աղետ է դառնում հասարակության համար։ Դուք հենց այդպիսի իշխանություն եք՝ ազատությունից և ինքնուրույնությունից զուրկ»,- ասել է պատգամավորը՝ դիմելով իշխող «Քաղաքացիական պայմանագիր» խմբակցությանը և երկրի վարչապետ Նիկոլ Փաշինյանին։
Նա նաև նշել է, որ մարդատյացը չի կարող իրականացնել մարդակենտրոն քաղաքականություն, իսկ նա, ով զուրկ է պետական մտածողությունից, չի կարող կառուցել անկախ և ինքնիշխան պետություն։
Ավելի վաղ Հակակոռուպցիոն կոմիտեն հայտնել էր, որ քրեական վարույթի շրջանակում մի քանի տասնյակ հասցեներում խուզարկություններ և այլ դատավարական գործողություններ են իրականացվել։ Մասնավորապես, խուզարկություններ են կատարվել Հայաստանի երկրորդ նախագահ Ռոբերտ Քոչարյանի և նրա որդու՝ ընդդիմադիր «Հայաստան» խմբակցության պատգամավոր Լևոնի տներում։ Ինքը նախագահը և նրա ավագ որդին՝ Սեդրակ Քոչարյանը, ձերբակալվել են։
Օգոստոսի 24-ին Լևոն Քոչարյանի և վարչապետ Նիկոլ Փաշինյանի միջև խորհրդարանում տեղի էր ունեցել բանավոր սուր վիճաբանություն։ Վերջինս Ազգային ժողովի ամբիոնից ուղիղ խոստացել էր խլել պատգամավորի ամբողջ ունեցվածքը՝ հայտարարելով, որ նա չի կարողանա այն ժառանգությամբ փոխանցել իր երեխաներին և թոռներին։
