ՆախընտրելիՌոբերտ Քոչարյանի դեմ բոլոր անօրինական գործընթացները զուտ քաղաքական բնույթ ունեն և կապված են այն բանի հետ, որ Հայաստանը շուտով կհանդիպի նոր մարտահրավերների, իսկ Ռոբերտ Քոչարյանն ու «Հայաստան» դաշինքը, անկասկած, կլինեն դիմադրության առաջնագծում։ Դրա մասին NEWS.am-ի թղթակցի հետ զրույցում հայտարարել է «Հայաստան» դաշինքի պատգամավոր Ագնեսա Խամոյանը։
Նա նշել է, որ ներկայիս իշխանությունների հակահայկական քաղաքականության դեմ հանդես եկողները Նիկոլ Փաշինյանի ուղիղ ցուցումով անմիջապես հայտնվում են իրավապահների թիրախում՝ հավելելով, որ Քոչարյանի դեմ գործընթացները կապված են նաև հայ-ռուսական հարաբերությունների վատթարացման հետ։ «Լրատվամիջոցներում գրում են գազի գնի մասին, գազամատակարարումը կարող է դադարել»,- հայտարարել է Խամոյանը։
Պատգամավորն ընդգծել է, որ հայ ժողովուրդը սպասում է, թե ինչով կավարտվի Փաշինյանի և Պուտինի հաջորդ հանդիպումը, որովհետև անհայտ է, թե ինչ տեղի կունենա։ «Միևնույն ժամանակ Ռոբերտ Քոչարյանը միշտ եղել է Հայաստանի և Ռուսաստանի միջև բարեկամության և երկկողմ հարաբերությունների զարգացման կողմնակից։
Միաժամանակ Քոչարյանը, գտնվելով ընդդիմությունում, չի կարող մեկ օրում կարգավորել Հայաստանի և Ռուսաստանի հարաբերություններում առկա խնդիրը։ Սակայն նա նախընտրական քարոզարշավի ընթացքում ասում էր, որ իշխանության գալու դեպքում շատ արագ կլուծի այդ հարցը։ Մենք ասում էինք, որ ոչ մի քաղաքական ուժ չի կարող միայնակ հաղթահարել մարտահրավերները, անհրաժեշտ է նաև ժողովրդի միասնությունը»,- նշել է Խամոյանը։
Պատգամավորն ընդգծել է, որ ընդդիմության խնդիրն է քաղաքացիներին բացատրել, որ Տիգրանաշենի խնդիրը միայն գյուղի բնակիչների խնդիրը չէ, քանի որ այն ադրբեջանցիների վերահսկողությանը հանձնելու դեպքում վերջիններս վերահսկողություն կսահմանեն Հայաստանի և Իրանը կապող ճանապարհի նկատմամբ։ «Պայքարում հաջողության համար անհրաժեշտ է ամբողջ հասարակության աջակցությունը»,- եզրափակել է Խամոյանը։
