նախընտրելի դարձնելNEWS.am-ի թղթակիցն այցելել է Չենդու քաղաքում գործող չին-նորզելանդական համատեղ լաբորատորիա, որը գործում է «Մեկ գոտի, մեկ ճանապարհ» նախաձեռնության շրջանակում։ Այստեղ երկու երկրների գիտնականները ստեղծում են կիվիի բոլորովին նոր, եզակի տեսակներ։
Քչերը գիտեն, որ կիվին պատմականորեն հենց Չինաստանից է ծագում։ Սակայն մեկ դար առաջ դրա սերմերը հասել են Նոր Զելանդիա, որտեղ սելեկցիոներները այն վերածել են համաշխարհային բրենդային արտադրանքի։ Այսօր այս լաբորատորիան միավորել է վայրի կիվիի չինական հարուստ գենետիկական ֆոնդը և սելեկցիայի նորզելանդական առաջավոր տեխնոլոգիաները։
Այսպիսի համագործակցությունը շահավետ է երկու կողմերի համար. Նոր Զելանդիան ստանում է հասանելիություն վայրի տեսակներին, որոնք ունեն ուժեղ բնական իմունիտետ բույսերի հիվանդությունների նկատմամբ, իսկ Չինաստանը զարգացնում է բերքի աճեցման և պահպանման բարձր տեխնոլոգիական չափանիշները։
Յուրաքանչյուր նոր տեսակի ստեղծումը երկարամյա մանրակրկիտ աշխատանքի արդյունք է։ Գիտնականները մանրամասն ուսումնասիրում են բույսերի աճը, դրանց կլիմայական դիմացկունությունը, բերքատվությունն ու, իհարկե, համային հատկությունները։
Այսօր լաբորատորիայում արդեն ստեղծվել է 24 նոր տեսակ։ Վաճառքում արդեն հայտնված չորս տարբերակներից NEWS.am-ի թղթակցին ամենից շատ դուր է եկել վառ վարդագույն միջուկով կանաչ կիվին։ Այն աներևակայելի քաղցր է և, իհարկե, վարդագույն։
Նախքան այսպիսի նորարարական մրգերը կհայտնվեն աշխարհի տարբեր երկրների խանութների դարակներում, դրանք անցնում են հիմնարար գիտական հետազոտությունների և փորձի միջազգային փոխանակման երկար ճանապարհ։
Դիանա Առուշանյան, Չենդու
