նախընտրելի դարձնել«Հայաստան» խմբակցության դիրքորոշումն Ալիևի պարտադրած սահմանադրության վերաբերյալ անփոփոխ է։ Այս մասին լրագրողների հետ զրույցում հայտնել է «Հայաստան» խմբակցության ղեկավար Աննա Գրիգորյանը։
Պատասխանելով սահմանադրության նախագիծն ԱԺ-ում հավանության արժանացնելու և հանրաքվեի դնելու՝ իշխանության ներկայացուցիչների գաղափարի մասին հարցին՝ Գրիգորյանն ընդգծել է, որ խմբակցության դիրքորոշումն անփոփոխ է։ Նա հիշեցրել է, որ նախընտրական շրջանում Նիկոլ Փաշինյանն իր ընտրողներին խոստացել էր փոխել սահմանադրությունը։ «Հայաստան» դաշինքը հակառակն էր խոստացել։ ««Հայաստան» խմբակցությունը չի կարող մտնել մի գործընթացի մեջ, որը գերազանցում է իր մանդատի շրջանակները կամ չի մտնում դրանց մեջ։ Հետևաբար, այս առաջարկն անընդունելի է։ Մենք դեմ ենք քվեարկելու ալիևյան սահմանադրությանը», - հայտարարել է Գրիգորյանը՝ հավելելով, որ «ժողովուրդը մեզ մանդատ է տվել՝ չընդունելու ալիևյան սահմանադրությունը, հետևաբար, չի կարելի մեզնից ակնկալել, որ «կողմ» քվեարկենք»։ Պատգամավորը նկատել է, որ իշխանությունները փորձում են շեշտադրել այն հանգամանքը, որ ընդդիմությունը ծանոթ չէ տեքստին։ Նրա խոսքով՝ սահմանադրության փոփոխության օրակարգը կարող էր քննարկման առարկա դառնալ, եթե խոսքը սուպերվարչապետական համակարգից հրաժարվելու մասին լիներ։ Միակ բանը, որ մեզ հայտնի է, այն է, որ Անկախության հռչակագրին հղում չի լինելու՝ այն, ինչ պահանջում է Ալիևը։ Ինչ գեղեցիկ բառեր էլ գրեն, դա ընդամենը գեղեցկացնելու փորձ է, բայց էությամբ և բովանդակությամբ սա Ալիևի պայմանն է, ընդգծել է Գրիգորյանը։
Պատասխանելով այս կամ այն ձևով ճնշում գործադրելու հնարավորության մասին հարցին՝ նա վստահեցրել է, որ յուրաքանչյուր պատգամավոր առաջնորդվում է իր խղճով և համոզմունքներով։ «Եթե Փաշինյանը, նրա ամբողջ խմբակցությունն ու թիմը մարդկանց հավաքեն և փորձեն ճնշում գործադրել, դա չի փոխի մեր դիրքորոշումը։ Նրան թվում է, թե ինքը կեպիով հեղափոխական է, բայց իրավիճակը փոխվել է», - նկատել է պատգամավորը՝ հավելելով, որ ընդդիմությունը պետք է պատրաստ լինի համարժեք պատասխանի մեխանիզմներ մշակել։
Նրա խոսքով՝ Փաշինյանի քարոզչության անկյունաքարն այն էր, որ եթե ՔՊ-ն սահմանադրական մեծամասնություն չհավաքի, պատերազմ է լինելու։ Ժողովուրդը տվել է իր պատասխանը, ասել է Գրիգորյանը։
Պատգամավորն ընդգծել է, որ ալիևյան սահմանադրության ընդունումը չի նշանակելու պահանջների ավարտ. անցած տարիների փորձը վկայում է այդ մասին։ «Այսպես՝ Փաշինյանը Պրահայում Արցախը ճանաչեց Ադրբեջանի մաս, նրան թվում էր, թե դրանով խնդիրները կավարտվեն, բայց այդպես չեղավ», - հիշեցրել է պատգամավորը։ Նա կարծում է, որ երաշխիքներ ասելով՝ իշխանությունները կարող են նկատի ունենալ Ադրբեջանից ստացված ինչ-որ փաստաթուղթ՝ Հայաստանի սահմանադրությունը փոխելու դեպքում խաղաղության համաձայնագիր ստորագրելու խոստումով։ «Մենք պե՞տք է հավատանք նրանց խոսքին։ Մենք չենք հավատում։ Մենք պե՞տք է վստահենք Ալիևի ազնիվ խոսքին։ Կամ Փաշինյանին, որը մեկ մի բան է ասում, մեկ՝ մի այլ բան։ Հայ ժողովուրդը տեսել է, թե ինչպես է Ալիևի և Փաշինյանի տանդեմը քայլեր ձեռնարկել հայ ժողովրդի դեմ», - նշել է պատգամավորը։
Գրիգորյանը նկատել է, որ կարող է պարզվել՝ կան անկլավների, ադրբեջանցիների վերադարձի և այլ պայմաններ։ Փաշինյանն ինքը վստահ չէ։ Նա նախկինում ասել է, որ չգիտի, թե որտեղով են անցնում Ալիևի «կարմիր գծերը», հիշեցրել է Գրիգորյանը։
