նախընտրելի դարձնելԵգիպտոսի հյուսիսում գտնվող Ալեքսանդրիա քաղաքում ԱՄՆ-ի պետքարտուղար Քլինթոնի ավտոշարասյունը լոլիկների եւ դատարկ շշերի «ռմբակոծման» է ենթարկվել:
Ինչպես տեղեկացնում է ՆՏՎ-ն, մի քանի ժամ հարյուրավոր բողոքողներ շրջափակել են Ամերիկայի հյուպատոսարանը, որտեղից ԱՄՆ-ի պետքարտուղարը պետք է ուղեւորվեր օդանավակայան: Այդ ամբողջ ժամանակ ամբոխին զսպել է ոստիկանությունը:
Ինչպես տեղեկացնում է Reuters-ը, հեռացող մեքենաներին նաեւ ճանապարհել են «Մոնիկա» բացականչություններով: Դժգոհ եգիպտացիները ցանկացել են Հիլարի Քլինթոնին հիշեցնել Մոնիկա Լեւինսկիի հետ նրա ամուսնու սկանդալային սեռական կապը:
«Առաջին ալիքը» հղում անելով Reuters-ին, ճշտում է, որ ո'չ բարձրաստիճան հյուրը, ո'չ էլ նրան ուղեկցողները չեն տուժել: Դրա փոխարեն տուժել են եգիպտացի պաշտոնյաները. լոլիկները պարզապես ոմանց դեմքին են դիպել:
Նշենք, որ Քլինթոն-Լեւինսկի աղմուկը բռնկվել էր 90-ականների վերջին եւ հանգեցրել ԱՄՆ-ի 42-րդ նախագահ Բիլ Քլինթոնի իմպիչմենթի գործընթացին, որը քիչ էր մնում հաջողութամբ պսակվեր: Հետագայում նախագահը խոստովանել էր, որ ինքն է երիտասարդ աղջկան սեռական հարաբերությունների դրդել:
