ՆախընտրելիՄոսկվայի մետրոպոլիտենում զանգվածային կռվով է ավարտվել կիրակնօրյա «Ռուսական երթը»: Կռվին մասնակցել են 100 մարդ: Մասնակիցները եղել են ազգայնականները եւ հակաֆաշիստական կազմակերպությունների ներկայացուցիչները:
Արյունահեղությունը կանխել են Մոսկվայի ոստիկանության աշխատակիցները, նաեւ` հատուկ ջոկատայինները, հայտնում է ՆՏՎ-ն:
Ավելի ուշ Մոսկվայի ոստիկանության մամուլի ծառայությունը հերքել է զանգվածային կռվի մասին տեղեկատվությունը:
Ինչպես հաղորդում է grani.ru-ի թղթակիցը, տուժել են մի քանի մարդ: «Ձախ ճակատի» ակտիվիստ Վասիլի Կուզմինին նետել են երկաթգծերի վրա, նա հաջողացրել է դուրս գալ մինչեւ գնացքի ժամանումը:
«Ինտերֆաքսին» կռվի մասին լուրը հաստատել է «Ձախ ճակատի» համակարգող Սերգեյ Ուդալցովը:
Ինչպես հայտնում է rbc-ն, «Տրետյակովսկայա» մետրոյի կայարանի մոտ ՆԳՆ-ի աշխատակիցները ձերբակալել են սեւ վերարկուներով եւ սվաստիկաներով 25 մարդու: Երթի ընթացքում ցուցարաները փորձել են խփել ոստիկանական ուղղաթիռը, սակայն անհաջող:
Հնչել են հետեւյալ կոչերը` «Փառք Պերունին», «Ազատություն գնդապետ Կվաչկովին», «Ազատություն Անդրես Բրեյվիկին», «Պուտինին հանձնել ժողովրդի դատին», «Վռնդել ներգաղթյալներին», «Չուբայսին նստեցնել էլեկտրական աթոռին», «Մի ծխիր, մի խմիր, շարժվիր», «Ծնիր երեխաներ» եւ այլն:
