ՆախընտրելիՂրղըզստանում ամերիկյան օդանավի աղետի ենթարկվելու վայրում հայտնաբերվել են երկու օդաչուների մարմինների հատվածները: Այս մասին հաղորդել են Ղրղըզստանի ԱԻՆ-ից:
Ղրղըզստանի դատաբժշկական փորձաքննության դիահերձարանում հայտնել են, որ զոհված օդաչուների մարմիններն իրենց մոտ չեն ստացվել, հաղորդում է «ՌԻԱ նովոստին»: Ամենայն հավանականությամբ, ամերիկացիները ինքնուրույն փորձաքննություն կիրականացնեն: Տեղի ունեցածի հանգամանքների հետաքննությունը նույնպես կիրականացնեն ԱՄՆ ներկայացուցիչները: Ղրղըզական կողմը միայն հաշվարկել է աղետի վնասները:
Ավելի վաղ NEWS.am-ը հայտնել էր, որ մայիսի 3-ին, Ղրղըզստանի եւ Ղազախստանի սահմանին կործանվել է Boeing C-135 լիցքավորող ինքնաթիռ, որը պատկանում է Տարանցային փոխանցումների ամերիկյան կենտրոնին («Մանաս» օդանավակայան»): ԱԻՆ տվյալներով, օդանավն ընկել է Ղազախստանի սահմանից ոչ հեռու, Չալդովար գյուղի մերձակայքում: Դեպքի վայր փրկարարներ եւ հատուկ խմբեր են ուղարկվել` հետազոտելու տարածքը, հաղորդում է «Ռոսբալտը»:
Ինքնաթիռը կորցրել էր կապը, անհետացել ռադարների էկրանից տեղական ժամանակով ժամը 14:30-ին:
«Մանաս» օդանավակայանը գտնվում է Բիշքեքից 20 կմ հեռավորության վրա, եւ ավելի քան 10 տարի օգտագործվում է ԱՄՆ-ի կողմից` Աֆղանստան բեռներ տեղափոխելու համար:
