նախընտրելի դարձնել41-ամյա Արմեն Եփրեմյանը (մականունը՝ «Թեփ Արմեն») սպանվելուց առաջ պատրաստվել էր գնալ հայրական տուն եւ իր ձեռքով տան դուռը բացել, ուր Ռուսաստանից վերադառնալուց հետո դեռ չէր հասցրել այցելել: Այս մասին NEWS.am-ի թղթակցի հետ զրույցում պատմեցին նրա ազգականները:
Իսկ սպանվելուց առաջ կնոջ հայրական տանից դուրս գալիս նրա հետ նաեւ իր կինն է եղել: Ավելին` կնոջը մինչեւ հիմա չեն ասել, որ Արմենը մահացել է, այլ փորձում են հանգստացնել, թե վիրահատության միջոցով փորձում են փրկել կյանքը: Ազգականները պատմեցին, որ Արմենը կնոջ հետ 12 տարի է՝ ինչ Հայաստանում չեն եղել: Բայց Արմենը ընդհանուր առմամբ 20 տարի է, ինչ Ռուսաստանում է գործունեություն ծավալում:
«Անսպասելիորեն աները վատացել էր: Լեղապարկը հեռացրեցին, չկարողացան կյանքը փրկել, իրենք էլ եկան հասան այդ արարողությանը, ու այսպիսի փորձանք տեղի ունեցավ»,- նշեցին ազգականները: Տեղեկացանք նաեւ, որ Արմենը 12 տարի առաջ կնոջն առեւանգել եւ մեկնել է Մոսկվա: Այդ տարիների ընթացքում առաջին անգամ էր վերադառնում Հայաստան:
Նա ունի երկու որդի՝ 12 եւ 4 տարեկան: Սպանվածի եղբայրը, ծնողները Մոսկվայում են: Նրանք արդեն տեղյակ են կատարվածի մասին: Արմենը ՌԴ-ում դատապարտված է եղել եւ բացատրություն էլ է տվել ոստիկանական բաժանմունքում, ինչի համար նրան «Ստուկաչ»-ով են սկսել դիմել:
Հանցաշխարհում նա հաճախ մարդ առեւանգելու պատվերներ է ստացել: Հարկ է նկատել, որ նրան դեռ մանկուց են «Թեփ Արմեն» ասել: Ազգականներից մեկը պատմեց, որ երեկ, երբ Արմենին հանդիպել է ու «Թեփ»-ով դիմել, Արմենին դա դուր չի եկել: «Ես իրան ասացի Թեփ: Ասաց ինձ Թեփ մի ասա, ես չգիտեմ, թե ինչի են ինձ Թեփ ասում»,- անկեղծացավ ազգականը:
Իսկ ոստիկանությունից տեղեկացանք, որ փաստի առթիվ քրեական գործ է հարուցվել ՀՀ քր.օր-ի 104 հոդվածի 1-ին մասով (Սպանություն): Սույն հոդվածը պատժվում է ազատազրկմամբ` 8-15 տարի ժամկետով: Քրեական գործ է հարուցվել նաեւ 235 հոդվածի հատկանիշներով`ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: Սույն հոդվածն էլ պատժվում է կալանքով` առավելագույնը 3 ամիս ժամկետով, կամ ազատազրկմամբ` առավելագույնը 3 տարի ժամկետով:
Մինչեւ այդ տեղեկացրել էինք, որ հայտնի է դարձել այսօր՝ նոյեմբերի 14-ին, Արմավիրի մարզի Սարդարապատ գյուղում քրեական հեղինակություն համարվող 41-ամյա Արմեն Եփրեմյանի («Թեփ Արմեն») սպանության մեջ կասկածվողը:
NEWS.am-ի տեղեկություններով, Արմեն Եփրեմյանի սպանության կասկածանքով բերման է ենթարկվել անհետ կորած «օրենքով գող» Գոռի հորեղբոր տղան՝ 21-ամյա Նժդեհ Եփրեմյանը: Կատարվածը վենդետա է, որը հին պատմություն ունի: Դեռ շատ տարիներ առաջ Գոռ անունով «օրենքով գողի» սպանության (նա մինչ օրս անհայտ կորած է, դիակը չի հայտնաբերվել) մեջ կասկածել են «Թեփ Արմենին»: Վերջինս այդ դեպքից հետո Հայաստանից հեռացել է: Երբ նա վերադարձել է Հայաստան, տնից դուրս գալիս հետո կրակել են ու սպանել: Փաստորեն Ն. Ենոքյանը վրեժխնդիր է եղել «Թեփ Արմենից» Գոռի սպանության համար:
Ավելի վաղ էլ NEWS.am-ը հայտնել էր, որ Սարդարապատ գյուղում այսօր սպանվել է 41-ամյա Արմեն Եփրեմյանը: Նա երկու օր առաջ եկել էր Մոսկվայից՝ ազգականի հուղարկավորությանը մասնակցելու համար: Նա քրեական հեղինակություն է եւ հայտնի է «Թեփ Արմեն» մականունով: Սարդարապատ գյուղում այսօր` նոյեմբերի 14-ին սպանված 41-ամյա Արմեն Եփրեմյանը՝ հայտնի «Թեփ Արմեն» մականունով, 20 տարի առաջ էր մեկնել հարազատ Սարդարապատ գյուղից Մոսկվա: Այս մասին NEWS.am-ի թղթակցի հետ զրույցում ասել էր Սարդարապատի գյուղապետ Բաբկեն Վարդանյանը: «Նրանց տունը մեր գյուղում է, բայց դռները 20 տարի է՝ փակ էր: Նոր էր վերադարձել: Ծնողները եւ, եթե չեմ սխալվում, երկու երեխաները այնտեղ են: Մեկ շաբաթ առաջ կնոջ հայրը` աները, ով մեր հարեւան գյուղից էր, մահացել էր եւ նա եկել էր, որ թաղմանը մասնակցեր: 2 օր առաջ էր թաղումը: Այսօր այնտեղից գյուղ վերադարռնալիս ճանապարհի մեջտեղում կրակել են: Հիվանդանոց տեղափոխելու ճանապարհին մահացել է».- պատմել էր գյուղապետը:
Պատրաստեց Տաթեւ Մեսրոպյանը
