նախընտրելի դարձնելՄի շարք իրավապաշտպան կազմակերպությունների ներկայացուցիչներ, քաղբանտարկյալների մի քանի տասնյակ հարազատներ ու ընկերներ այսօր` սեպտեմբերի 9-ին, Հայաստանի քաղբանտարկյալներին ազատելու պահանջով հավաքվել էին Ազատության հրապարակում:
NEWS.am-ի թղթակիցը հաղորդում է, որ ակցիայի մասնակիցներն իրենց հետ Ազատության հրապարակ էին բերել «Պայքարը կյանք է, անտարբերությունը` մահ», «Ազատությունն սկսվում է քաղբանտարկյալների ազատությունից» գրությամբ պաստառներ:
«Այսօր աշխարհի մի շարք քաղաքներում մեր հայրենակիցները բողոքի ակցիաներ են անցկացնում, բողոքում են Հայստանում քաղբանտարկյալների առկայության դեմ: Մենք էլ այստեղ ենք հավաքվել, նպատակը միասնականությունն է, եւ մեր միասնական պահանջն է ազատել Հայաստանի 17 քաղբանտարկյալներին»,-լրագրողների հետ զրույցում ասաց ակցիայի մասնակիցներից Ֆելիքս Հայրապետյանը` նշելով, որ եթե անգամ տարբեր երկրներում մարդիկ բողոքի ակցիաներ չիրականացնեին, միեւնույն է, իրենց բողոքն արդարացված կլիներ, քանի որ իրենց վրդովեցրել է նախորդ օրը Նոյեմբերի 5-ի գործով ամբաստանյալ, անչափահաս Շահեն Հարությունյանին 5 տարով ազատազրկելու` դատախազ Գեւորգ Գեւորգյանի պահանջը:
Նշենք, որ ակցիային մասնակցում էր «Նոր քաղաքական մշակույթ» կուսակցության նախագահ Անի Զախարյանը, Նախախորհրադարանի անդամներ:
Նախախորհրդարանի անդամ Գագիկ Սարուխանյանի խոսքով` եթե անգամ քաղբանտարկյալներին ազատեն, դա ազատություն չի լինի, քանի որ Հայաստանը կալանավայր է:
«Հայաստանը մեծ բերդ է, բոլորս էլ քաղբատարկյալներ ենք, պարզապես տղաները գտնվում են մեկուսարանում»,- հայտարարեց նա:
«Նոյեմբերի 5-ի գործով» ամբաստանյալ Լիպարիտ Պետրոսյանի եղբայրը, որը նույնպես Ազատության հրապարակում էր, ասաց, որ Լիպարիտ Պետրոսյանին 6 տարի 6 ամիս ազատազրկելու` դատախազի պահանջն անարդարացի էր եւ չի կարող վախեցնել ու հետ պահել եղբորը ազատության համար պայքարից:
«Ես կարծում եմ, որ դա հորինված մեղադրանք է: Կառավարության քմահաճույքն է ճնշել եւ սպանել առողջ ուժերին, անհատներին, ովքեր խոսում ու մտածում են, հոգատար են: Արդարացի չի»- ասաց նա:
«Նոյեմբերի 5-ի գործով» առաջին դատական նիստից առաջ դատարանի մոտ 5 ոստիկանի վիրավորած Հայկ Կյուրեղյանի եղբայր Արեգ Կյուրեղյանը նույնպես մասնակցում էր ակցիային, նա NEWS.am-ի հետ զրույցում պատմեց, որ խոսել է եղբոր հետ, նրա վիճակը լավ է:
Ակցիայի մասնակիցները կարծում են, որ քաղաքական հետապնդումների զոհ է նաեւ դերասան Վարդան Պետրոսյանը, որի «գլխին ուղղակի գործ են սարքում»:
Կինոռեժիսոր Տիգրան Խզմալյանն ակցիայի ժամանակ ասաց, որ քիչ առաջ է խոսել Վարդան Պետրոսյանի հետ, հարցրել է, թե ինչպես է իրեն զգում, նա էլ պատասխանել է, որ իր կողքին լավագույն մարդիկ են:
Լուսանկարը՝ Արսեն Սարգսյանի/NEWS.am
