նախընտրելի դարձնելԷլեկտրաէներգիայի գնի բարձրացման դեմ հունիսի 23-ի բողոքի ակցիայի մասնակից, եկել «Ոչ էլեկտրաէներգիայի թանկացմանը» նախաձեռնության անդամ Վահան Դուրինյանը չի պատրաստվում վճարել ոստիկանության օրինական պահանջը չկատարելու համար վարչական տույժը եւ այն վիճարկելու է դատարանում: Այս մասին այսօր՝ հոկտեմբերի 8-ին, վարչական դատարանում կայացած առաջին դատական նիստից հետո NEWS.am-ի հետ զրույցում ասաց Վահան Դուրինյանը:
«Ըստ արձանագրության հունիսի 23-ի ակցիայի ժամանակ ես չեմ ենթարկվել ոստիկանության օրինական պահանջին: Բայց օրինական պահանջ ընդհանրապես չի եղել այդ օրը, որը կարելի կլիներ քննարկել ինչքանով է օրինական»,-ասաց նա:
Դուրինյանը նշեց, որ այս արձանագրոթյունը անհիմն է, դա իրեն չի վախեցնելու, եւ ինքը որպես ակտիվ քաղաքացի հետագայում էլ շարունակելու է պայքարել:
Նշենք, որ այսօր առաջին դատական նիստը հետաձգվեց, քանի որ Վահան Դուրինյանը պահանջեց փաստաբան, որը կպաշտպանի իր շահերը դատարանում:
Վահան Դուրինյանին աջակցելու էին եկել «Ոչ էլեկտրաէներգիայի թանկացմանը» նախաձեռնության մեկ տասնյակից ավելի անդամներ, որոնց մի մասը նույնպես ծանուցագրեր էր ստացել Վարչական դատարանից:
«Մենք շատ վրդովված ենք այս երեւույթի դեմ, փաստորեն ստացվում է, որ ակցիա անելը դառնում է օրենքի խախտում, եւ անհիմն վարչական տուգանքներ են գրվում: Այնպիսի տպավորություն է, որ խաղաղ ակցիա անել չի կարելի այս երկրում»,-ասաց նախաձեռնության անդամ Լեւոն Զաքարյանը, ում նույնպես դատարանից ծանուցագիր էր ուղարկվել:
Նախաձեռնության մեկ այլ անդամի՝ Հայկ Ավետիսյանի խոսքով՝ ոստիկանությունը փորձում է այս կերպ ազդել ակտիվություն ցուցաբերող քաղաքացիների վրա, որպեսզի վերջիններս չնախաձեռնեն բողոքի ակցիաներ:
«Իհարկե չի կարող ազդել մեզ վրա,որոցհետեւ մենք համոզված ենք մեր իրավաչափ գործողությունների մեջ: Մենք գիտենք մեր իրավունքները, նաեւ գիտենք ոստիկանության իրավունքներն ու պարտականությունները»,-հավելեց նա:
Հիշեցնենք, որ էլեկտրաէներգիայի գնի բարձրացման դեմ հունիսի 23-ի բողոքի ակցիայի 20-ից ավելի մասնակիցներ վերջին օրերին վարչական դատարանից ծանուցումներ են ստանում, որ իրենց նկատմամբ գործեր են հարուցվել՝ ոստիկանի օրինական պահանջը չկատարելու համար: Նրանք այս ծանուցումներն անօրինական են համարում եւ չեն պատրաստվում վարչական տույժեր վճարել:
