նախընտրելի դարձնել«Ես դեռ չծնված՝ դուք խլում եք իմ տակաշորի գումարը», «Մի գողացեք մայրիկիս գումարը», «Մեկ մայրն ուժեղ է, միասին կստեղծենք բանակ» գրությամբ պաստառներով մի քանի տասնյակ երիտասարդ ծնողներ այսօր՝ հոկտեմբեր 27-ին, հավաքվել են Ազգային ժողովի շենքի մոտ, որտեղ պատրաստվում են ներկա գտնվել «Ժամանակավոր անաշխատունակության նպաստների մասին» ՀՀ օրենքում փոփոխությունների նախագծի խորհրդարանական լսումներին:
NEWS.am-ի թղթակիցը հաղորդում է, որ ծնողներից ոմանք ԱԺ-ի մոտ են բերել նաեւ իրենց երեխաներին: Հավաքվածների խոսքով՝ նոր օրենքը բացասական հետեւանքներ կունենա՝ հանգեցնելով ծնելիության կտրուկ նվազմանը:
«Վտանգված է այն կանանց երեխա ունենալու որոշումը, որոնք մինչեւ հղիանալը տարբեր տեսակի հարկեր են մուծել պետությանը: Այդ օրենքի ընդունումը կնշանակի, որ պետությունը չի ուզում, որ աշխատող կանայք երեխաներ ունենան: Ես միտում եմ տեսնում, որ նման նախագծերը գողեգող օրենք են դարձնում: Բոլոր իրավագիտակից մարդիկ պետք է թույլ չտան, որ այս նախագիծը դառնա օրենք: Թող էլի բարձրացնեն չաշխատող մայրերի գումարը, բայց ոչ մեր հաշվին, պետք չէ դրա համար կրճատել մեր գումարը»,- ԱԺ շենքի մոտ լրագրողներին ասաց հավաքվածներից Մանե Թանդիլյանը:
Բողոքի ցույցի մասնակիցներից 10-ը նախապես գրացվել են, նրանք պատրաստվում են ԱԺ-ում խորհրդարանական լսումներին ելույթ ունենալ։
Նշենք, որ ըստ օրենքի փոփոխությունների, կրճատվում է աշխատող հղի կանանց նախածննդյան և հետծննդյան արձակուրդի համար վճարվող նպաստի չափը, դրվում է միջին աշխատավարձի վերին շեմ, որից հաշվարկվելու է մայրության նպաստը, կրճատվում է երեխայի խնամքի նպաստի տևողությունը՝ մինչև երեխայի մեկ տարին լրանալը (ներկայում վճարվում է մինչև երեխայի 2 տարին լրանալը): Կառավարությունը փոփոխությունները հիմնավորում է այդ գումարների հաշվին չաշխատող կանանց համար մայրության նպաստ սահմանելու անհրաժեշտությամբ։
