նախընտրելի դարձնելՆոյեմբերի 11-ի երեկոյան սկսված ու հաջորդ օրը շարունակված ուժեղ քամին ու փոթորիկը մեծ վնաս է հասցրել Լոռու մարզի գրեթե բոլոր համայնքներին: NEWS.am-ի թղթակիցը հաղորդում է, որ Դսեղում ծառն ընկել է Հովհաննես Թումանյանի տուն-թանգարանի տանիքին, Չկալովում քամին վնասել է նորակառույց եկեղեցին, Ախթալայում ու Կաթնառատում ամբողջությամբ քշել տարել համայնքապետարանների շենքերի տանիքը, Վանաձորում՝ թիվ 27 դպրոցի թիթեղյա տանիքը: Ալավերդիում Վանաձորի Տիգրան Մեծի 54 հասցեի բարձրահարկ շենքից մայթի վրա կախված տանիքը դեռ գիշերվանից այսօր էլ մեծ վտանգ է ներկայացնում:
Ալավերդիում 183 շենքերից 111-ի տանիքները լրիվ կամ մասնակի վնասվել են, ամբողջությամբ քանդվել են երեք Էլեկտրաենթակայանների տանիքները, Թումանյանի տարածաշրջանում ընկել են բարձրավոլտ մի քանի սյուներ:
Ուժեղ քամին հիմնովին կամ մասնակի վնասել է մի քանի հարյուրի հասնող բնակելի շենքերի, դպրոցների, մշակութային ու մարզական կենտրոնների տանիքներ, արմատախիլ են եղել տասնյակ ծառեր, որոնց մի մասն ընկնելով՝ փակել են ճանապարհները, վնասել գազատարներն ու էլեկտրասյուները:
Լոռու մարզի փրկարարական վարչության պետ Հրաչիկ Անտոնյանը առավել շատ տուժած համայքներից առաձնացնում է Վանաձորը՝ հավելելով, որ մեծ են վնասի չափերը նաև Թումանյանի, Սպիտակի, Տաշիրի տարածաշրջաններում:
Ուժեղ քամու հետևանքով մարզի գյուղական ու քաղաքային համայնքների մեծ մասը տևական ժամանակով զրկվել է էլեկտրաէներգիայից: Բարձրավոլտ էլեկտասյուների վնասման հետևանքով նախօրեին ողջ օրը դադարեցվել է երկաթուղու աշխատանքը:
Քամու հետևանքով հոսանքազրկվել էր մարզի 83 գյուղական և 7 քաղաքային համայնքների լուսավորությունը:
Երեկվանից արտակարգ ռեժիմով են աշխատում մարզի բոլոր գերատեսչությունները: Իրականացված օպերատիվ վթարավերականգնողական աշխատանքների արդյունքում արդեն վերականգվել է 43 գյուղական և 5 քաղաքային համայնքների լուսավորությունը: Ոլորտի պատասխանատուները վստահ են, որ մնացած համայնքների լուսավորության վերականգնումը ավարտին կհասցնեն այսօրվա ընթացքում:
Այսօր՝ նոյեմբերի 13-ին, Լոռու մարզպետարանում անցկացվել է կացվել արտակարգ իրավիճակներում գործող հանձնաժողովի նիստ, որի անդամներին տրվել է հանձնարական՝ բոլոր համայնքներում կազմել հանձնաժողովներ, հաշվարկել վնասի չափերը: Առաջիկա օրերի ընթացքում տվյալներն ամբողջացնելուց հետո դրանք կներկայացվեն կառավարությանը:
Առայժմ պարզ չէ՝ արդյոք տուժածներին փոխհատուցում կհատկացվի:
