նախընտրելի դարձնելԱմերիկյան Հյուսթոն քաղաքի բնակիչը որոշել է ընկերուհուն անսովոր եղանակով առաջարկել իր ձեռքն ու սիրտը` դրա համար ինքնատիպ վայր ընտրելով` քաղաքի ամենաաշխույժ մայրուղիներից մեկը` Interstate-45-ը: Ընկերների եւ հարազատների միջոցով նա փակել է խճուղին` որոշ ժամանակով ամբողջովին կանգնեցնելով երթեւեկությունը, ինչից հետո նրա ընտրյալը «այո» է ասել:
Աղջիկը միջադեպի տեսագրությունը տեղադրել է Instagram-ի իր էջում` տեսանյութին հավելելով մեկնաբանություն այն մասին, թե ինչ երջանիկ է: Իմիջիայլոց, ներկայումս էջն անհասանելի է: Սիրահարները հավանաբար ստիպված լինեն հետաձգել հարսանիքը:
Երեքշաբթի` դեկտեմբերի 15-ին երիտասարդին ճանապարհային երթեւեկությանը խոչընդոտելու մեղադրանք են ներկայացրել: Նրան մինչեւ վեց ամսվա ազատազրկում է սպառնում, ինչպես նաեւ տուգանք երկու հազար դոլարի չափով, տեղեկացնում է AP-ը:
Գործակալության տվյալներով, երիտասարդին կոչում են Վիդալ Վալադարես, իսկ նրա ընտրյալին` Միշել Ուայկոֆֆ: ABC-ն հաղորդում է, որ երիտասարդները 24 եւ 23 տարեկան են, տեղեկացնում է Newsru-ն:
Լրագրողներին տված հարցազրույցում նրանք տեղեկացրել են, որ ծանոթացել են մոտավորապես մեկ ու կես տարի առաջ: Սիրահարները պատրաստվում են մարտին հարսանիք անել:
