նախընտրելի դարձնելԻսրայելցի գիտնականները «խելացի» ճամպրուկ են ստեղծել, որը շարժվում է իր տիրոջ հետեւից: Այդ սարքը նախագծել են Nua Robotics ընկերության աշխատակիցները:
Խելացի ճամպրուկը տեսախցիկի հետ ներկառուցված տվիչ ունի, որը որոշում է տիրոջ գտնվելու վայրը: Սակայն արժե նշել, որ սարքն առայժմ կարող է տեղաշարժվել միայն հարթ տարածության վրա եւ տիրոջ հետեւից: Շարժման ընթացքում ճամպրուկի տերն անընդհատ տեղեկանում է, թե այդ պահին որտեղ է իր «խելացի» օգնականը:
Նշանակալի է այն, որ բավականին բարդ կլինի նման ճամպրուկը գողանալը, բայց եթե ինչ-որ մեկի մտքով անցնի յուրացնել այդ սքանչելի հարմարանքը, «խելացի» սարքը տագնապի ահազանգ կհնչեցնի, տեղեկացնում է Informing-ը:
Եվս մեկ հետաքրքիր մանրամասն. սարքը լիցքավորվում է հենց շարժման գործընթացում: Պետք է ասել, որ գյուտն առայժմ մինչեւ վերջ մշակված չէ, սակայն արդեն փորձարկվում է տարբեր պայմաններում:
Նախատիպի պրեմիերան տեղի է ունեցել CES-2016 նոր նվաճումների ցուցահանդեսին: Հաջող թեստավորման դեպքում խելացի ճամպրուկը մանրածախ առեւտրում կհայտնվի արդեն 2016-ի վերջին:
Ինչպես պնդում են մշակողները, նրանց գյուտը միայն հարուստ զբոսաշրջիկների համար չէ: Ռոբոտ-ճամպրուկում կիրառված նոր տեխնոլոգիաները կարելի է օգտագործել սուպերմարկետային սայլակներում, ինչը կարեւոր կլինի տարեցների համար: Մշակողները նաեւ կարծում են, որ տիրոջն ամեն քայլափոխի հետեւող ճամպրուկի ունիվերսալությունն այն ուղղակի անփոխարինելի իր կդարձնի ճանապարհորդելու սիրահարների համար:
