ՆախընտրելիԵրեւանի «Վերնիսաժ» շուկայում Նովրուզի օրերին Հայաստան եկած իրանցի զբոսաշրջիկների շնորհիվ առեւտուրն ակտիվացել է: Երեւանում իրենց Ամանորը` Նովրուզը տոնող իրանցիները «Վերնիսաժից» այս օրերին հիմնականում կենցաղային իրեր, զարդեր եւ հուշանվերներ են գնում:
«Մարտի 21-ից շատ-շատ են գալիս մեզ մոտ, իրանցիները հիմնականում կենցաղային իրեր են գնում` հայկական սինիներ, ափսեներ, տարազներ, մայկաներ, մագնիսներ, թզբեհներ, կտորից պատրաստված ազգային հացամաններ: Գունավոր ապրանքներ շատ են սիրում, ինչ գունավոր բան կա առնում են»,-NEWS.am-ի հետ զրույցում ասաց «Վերնիսաժի» առեւտրականներից տիկին Ռիտան:
Առեւտրականների խոսքով, իրանցի զբոսաշրջիկներն անգամ ամենաէժան ապրանքը գնելիս` փորձում են էժանացնել, առեւտրականներն էլ ստիպված ընդառաջում են նրանց` ապրանքը վաճառելու համար:
«Իրենք ինչ ապրանք էլ գնեն` աշխատում են գինը գցել: Մենք էլ ընդառաջում ենք, հարմարվում: Մեր հյուրերն են, թող գոհ մնան, էժանացրած տալիս ենք: Իրենց գալուց առաջ դրանք չէինք էլ կարողանում վաճառել, տենց մնում էին` հիմա գոնե վաճառում ենք »,-ասում է առեւտրականներից տիկին Գոհարը:
Հակառակ «Վերնիսաժի» առեւտրականների պնդումների, թե իրենք ապրանքի գինն իջեցնում են վաճառելիս` իրանցի զբոսաշրջիկները դժգոհ են: Ալին, որն արդեն մեկ շաբաթ է Երեւանում է, նշում է, որ ամենաթանկ ապրանքը վաճառվում է «Վերնիսաժում», նրա խոսքով` Երեւանի այլ շուկաներում եւ առեւտրի կենտրոններում կարելի է նույն ապրանքը գտնել ավելի էժան:
«Այլ տեղեր ավելի լավ բաներ եմ տեսել` ավելի էժան տարբերակով, այստեղ շատ թանկ է, չեն էլ էժանացնում: Բայց մի քանի բան գնել եմ որպես հուշանվեր` ընկերներիս տալու համար»,-ասաց նա:
Ալին «Վերնիսաժի» մասին լսել է նախորդ տարի Երեւան ժամանած իր ընկերներից եւ նրանց խորհրդով է եկել այդտեղից առեւտուր անելու. «Ընկերներս ինձ ասել են, որ այստեղ կարող եմ շատ հետաքրքիր բաներ գտնել, բայց հիմնականում ոչինչ չեմ գտել, զարդերն են շատ գեղեցիկ, բայց դրանք շատ թանկ են»:
Նշենք, որ հարեւան Իրանի Իսլամական Հանրապետությունից իրանցի զբոսաշրջիկները այս օրերին Հայաստան են եկել իրենց Ամանորը` Նովրուզը տոնելու:
