ՆախընտրելիԳյումրիի Վազգեն Ա-ի անվան թիվ 27 դպրոցում այսօր՝ մայիսի 24-ին, հայոց պատմության դասասենյակն անվանակոչվեց նույն դպրոցի սան, ապրիլի 1-ին ԼՂՀ-ում հերոսաբար զոհված 20-ամյա Վլադիմիր Մելքոնյանի անունով:
Վլադիմիրի անունով անվանակոչված դասասենյակի մի անկյունում հերոսի մասին խոսող նկարներ, առարկաներ ու հուշատետր էր դրված, որտեղ թե այցելուները, թե աշակերտները իրենց կարծիքն են գրում հերոսի մասին:
Դպրոցի տնօրեն Կարինե Լալազարյանը նշեց, որ Վլադիմիրի ներկայությունը միշտ զգացվելու է այս դպրոցում, նրան երբեք բացակա չեն դրել. «Մեր հերոս տղան միշտ մեզ հետ է, ու հիմա մեր նպատակը մեկն է՝ այս սենյակում դաստիարակել հայրենասեր զինվորներ»:
NEWS.am-ի հետ զրույցում Վլադիմիրին դասավանդած ուսուցիչները հպարտությամբ են խոսում նրա մասին: «Չափից դուրս հայրենասեր տղա էր, միգուցե դա իրեն մոտ գեներով է գալիս՝ հայրը նույնպես արցախյան պատերազմի մասնակից է եղել, ինքը լուռ ինքնամփոփ. բայց անդադար հարցնում էր 90-ականների պատերազմի մասին, հետաքրքրվում էր հայրենիքով»,-ասաց «նախնական զինվորական պատրաստություն» առարկայի ուսուցիչ Գարեգին Ջամբազյանը:
Վլադիմիրի ամենասիրած առարկաները հայոց պատմությունն ու ՆԶՊ-ն են եղել: «Վլադիմիրը դասերի ավարտից հետո մնում էր, որ ուսումնասիրի զենքերն ու պատերազմական տարիների մասին ավելի շատ տեղեկություն իմանա Գարեգին Ջամբազյանից, քանի որ ուսուցիչը եւս արցախյան պատերազմի մասնակից է եղել:
«Մենք ինքնաձիգ ունեինք, դասերից դուրս գալիս էր ասում էր՝ ընկեր Ջամբազյան, թող մի հատ ինքնաձիգը քանդեմ-հավաքեմ: Ես առանց զլանալու իր բոլոր հարցերին պատասխանել եմ, ինքնաձիգն ինչքան ուզել քանդել –հավաքել է»,-ասաց Գարեգին Ջամբազյանը:
Ժաննա Մարտիրոսյանը՝ Վլադիմիր դասղեկը, ամենալավն է ճանաչել հերոսին: «Մենք այսօր մեծ հպարտություն ենք ապրում, որ Վլադիմիրի անվան դասասենյակ ունենք եւ հույս ունեմ , որ նոր սերունդը անպայման կդաստիարակվի Վլադիմիրի ոգով, կլինեն մեծ հայրենասերներ: Ես ուզում եմ որ իրենք արժանի լինեն իրենց ընկերոջը»,-ասաց Ժաննա Մարտիրոսյանը:
«Ես հպարտ եմ , որ այսպիսի զինվորներ ունենք: Դիրքերում գտնվող բոլոր տղաներն էլ մեր ընկերներն ու եղբայրներն են եւ նրանց մաղթում եմ , որ ամուր լինեն եւ Աստված նրանց հետ: Մենք այս դասասենյակը աչքի լույսի նման կպահենք ու կփոխանցենք մյուս սերունդներին»,-ասաց աշակերտներից Մերուժան Փիլոսյանը:
