ՆախընտրելիԵրեւանի պետական բժշկական համալսարանում այսօր՝ հունիսի 7-ին, բացված քննական կենտրոնում «Հայոց լեզու եւ հայ գրականություն» առարկայի միասնական քննություն հանձնող դիմորդների ծնողները դժգոհ են քննական կենտրոնի մոտ տեղադրված էկրանից, որը նախատեսված է քննության ընթացքին հետեւելու համար: «Ոչինչ չի երեւում, պատկերն այնքան խավար է, որ ոչ մեկս չենք գտնում մեր երեխաներին»,-NEWS. am-ի հետ զրույցում ասաց ծնողներից մեկը:
Ծնողներից մեկն էլ նշեց, որ իր երեխաներից մեկը ընդունելության միասնական քննությունները հանձնել է Երեւանի Դավթաշեն վարչական շրջանի դպրոցներից մեկում, սակայն, էկրանների հետ խնդիրներ չեն եղել. «էկրաններն այնպես էին դրված, որ հնարավոր լիներ հետեւել ամբողջ ընթացքին: Ու մի էկրան չէր դրված, մի քանիսն էին», - նշեց նա:
Դիմորդներից մեկի հայրն էլ նշեց, որ իրենց միայն 10 րոպե ընթացքին հետեւել թույլ տալով՝ սահմանափակում են իրենց իրավունքները:
Քննական կենտրոնի աշխատակիցները ծնողներին ասացին, որ կարգն է այդպիսին, իրենք ոչինչ անել չեն կարող, ծնողներին թույլատրվում է խմբերով մոտենալ էկրանին, 10 րոպե հետեւել ընթացքին:
Նշենք, որ այս քննական կենտրոնում քննություն է հանձնում 160 դիմորդ, որոնցից 10-ը բացակա է:
Հիշեցնենք, որ այսօր հանրապետությունում մեկնարկել են Հայոց լեզու եւ Հայ գրականություն առարկաների ընդունելության միասնական քննությունները: 11 հազար 375 դիմորդից այս տարի այդ առարկաներից քննություն է հանձնում ավելի քան 6 հազար դիմորդ:
