նախընտրելի դարձնելՀեռահաղորդակցության օպերատորները «OTT» ծառայությունների պատճառով վնասներ են կրում: Այս մասին, փետրվարի 7-ին, ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանի՝ «ՎիվաՍել-ՄՏՍ» ընկերություն այցելության ժամանակ նշել է ընկերության տնօրեն Ռալֆ Յիրիկյանը:
Այցի նպատակը ընկերության ծրագրերին ծանոթանալն ու ոլորտի խնդիրները լսելն էր: Բարձր կարեւորելով ընկերության դերը երկրի տնտեսության մեջ՝ Վահան Մարտիրոսյանն ընդգծեց, որ գնահատում է նաեւ այն սոցիալական պատասխանատվությունը, որը «ՎիվաՍել-ՄՏՍ»-ը վերցրել է իր վրա։
Ընկերության տնօրեն Ռալֆ Յիրիկյանի խոսքով` հեռահաղորդակցության ոլորտում խնդրահարույց շրջան է բոլոր օպերատորների համար. խնդիրները ոչ թե մրցակցային դաշտում են, այլ՝ ռազմավարական:
Ընկերության տնօրենը խոսեց հաճախականությունների համար արվող պետական վճարների մասին: Ռալֆ Յիրիկյանի պնդմամբ` եկամուտների կրճատման ֆոնին դրանք զգալի ֆինանսական բեռ են դարձել:
Նախարարն էլ նկատեց, որ հաճախականություններն անսպառ ռեսուրսներ չեն, եւ առաջնայինը ոչ թե շահագործման սակագնի վերանայումը, այլ դրանք հնարավորին խնայողաբար օգտագործելն է:
Ռալֆ Յիրիկյանը նշեց, որ «ՎիվաՍել-ՄՏՍ»-ը ներկայում ամենաքիչ հաճախականություններ օգտագործող օպերատորն է: Նա անդրադարձավ նաեւ ոլորտի պաշտպանվածությանը, նշելով, որ «OTT» ծառայությունների հավելվածները զգալի նվազեցրել են ձայնային ծառայությունների օգտագործման ծավալները: Մարդիկ գերադասում են մատչելի ինտերնետից օգտվելով զանգեր կատարել ու հաղորդագրություններ ուղարկել «Սքայփով» կամ «Վայբերով», քան օգտվել GSM ծառայություններից:
«ՎիվաՍել-ՄՏՍ»-ի գլխավոր տնօրենի խոսքով` այդ հավելվածներն օգտվում են օպերատորների ենթակառուցվածքներից` առանց որեւէ եկամուտ բերելու պետությանը կամ օպերատորին: Ռալֆ Յիրիկյանը կանխատեսեց, որ շուտով այդ գործընթացը կբերի եկամուտների խիստ նվազման, այն աստիճան, որ օպերատորները կպակասեցնեն ներդրումները:
Նախարարն ընդգծեց, որ այդ իրավիճակն ամբողջ աշխարհում է: Հեռահաղորդակցության օպերատորներին մնում է նոր տեխնոլոգիաներ ներդնել, որոնք էլ նոր ծառայությունների մատուցման հնարավորություն կտան:
Վահան Մարտիրոսյանը բարձրացրեց նաեւ ռոումինգի սակագների հարցը: Նա նշեց, որ Ռուսաստանում կապի նախարարի հետ հանդիպման ընթացքում քննարկել են ԵՏՄ տարածքում ռոումինգի ծառայությունների սակագնին վերաբերող հարցեր:
Ընկերության իրավաբանական վարչության պետ Արմինե Սարգսյանը նշեց, որ քննարկումների առաջին փուլում ռոումինգի սակագների որոշակի նվազեցում արվել է, բայց քանի որ ԵՏՄ անդամ պետությունների տնտեսությունները տարբեր են, միեւնույն մոտեցումը կիրառելը կարող է հանգեցնել շահերի բախման:
Նախարարը հայտնեց, որ ԵՏՄ անդամ երկրների համար քննարկվում են նաեւ ազգային արժույթով փոխհաշվարկներ կատարելու հնարավորությունները:
Վահան Մարտիրոսյանն առաջարկեց, որպեսզի այս թեմայով եւս «ՎիվաՍել-ՄՏՍ»-ը վերլուծություն անի ու տեսակետ ներկայացնի դրա շահավետության վերաբերյալ:
Նախարար Վահան Մարտիրոսյանը նախատեսում է այցելություններ նաեւ հեռահաղորդակցության շուկայում գործող այլ ընկերություններ` ոլորտի մարտահրավերներին արձագանքելու նպատակով քայլեր ձեռնարկելու համար:
