նախընտրելի դարձնելՀՀ քննչական կոմիտեի նախագահ Աղվան Հովսեփյանը պնդում է, որ ԱԺ ընտրություններից առաջ Ջրառատում տեղի ունեցած միջադեպի գործով օրինականությունը պահպանվել է: Այսօր՝ ապրիլի 24-ին Ծիծեռնակաբերդում լրագրողները նրանից հետաքրքրվեցին, թե որքանո՞վ է խորհրդարանական ընտրություններից առաջ տեղի ունեցած միջադեպերի, մասնավորապես, Ջրառատի դանակահարության գործով նախաքննությունը կատարվել օրինականության սահմաններում:
«Բոլոր դեպքերով, նաեւ Ջրառատի, օրինականությունը պահպանվել է»,-ասաց Աղվան Հովսեփյանը:
Դիտարկմանը, որ ՀՀ փոխոստիկանապետ Լյովա Երանոսյանի եղբայրը՝ Լեռնիկ Երանոսյանը տուժող է ճանաչվել, այն դեպքում երբ նա զենք է պահել միջադեպի մասնակիցներից մեկի վրա, Աղվան Հովսեփյանն ասաց, որ եթե որեւէ մեկը նման մանրամասներ գիտի, թող քննչական կոմիտեում ցուցմունք տա:
Ավելի վաղ NEWS.am-ը հայտնել էր, թե Ջրառատ գյուղում տեղի ունեցած միջադեպի առթիվ հարուցվել է քրեական գործ, ՀՀ քրեական օրենսգրքի 3 հոդվածներով՝ 112-րդ (Դիտավորությամբ առողջությանը ծանր վնաս պատճառելը), 258-րդ (Խուլիգանությունը) եւ 235-րդ (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) հոդվածների հատկանիշներով։
«Օհանյան-Րաֆֆի-Օսկանյան» նախընտրական շտաբը հաղորդագրություն էր տարածել, որ Արմավիրի մարզի Ջրառատ գյուղում Հայաստանի Հանրապետական կուսակցության (ՀՀԿ) տեղական կառույցի ներկայացուցիչները զինված հարձակում են գործել «Օհանյան-Րաֆֆի-Օսկանյան» դաշինքի համակիրների վրա, որի արդյունքում կան վիրավորներ:
Մարմնական վնասվածքներով հիվանդանոց էին տեղափոխվել 17-ամյա Արայիկ Մելքոնյանը, 26-ամյա Հակոբ Մելքոնյանը եւ 53-ամյա Մելիք Մելքոնյանը:
Ըստ «Օհանյան-Րաֆֆի-Օսկանյան» դաշինքի ներկայացուցիչների, հարձակվողները դուրս են եկել գյուղապետարանի շենքից: Միջադեպին առնչություն են ունեցել Երանոսյանյան եղբայրները եւ նրանց հարազատները:
