նախընտրելի դարձնելԵրեւան քաղաքի ընդհանուր իրավասության դատարանի Շենգավիթի նստավայրում այսօր՝ սեպտեմբերի 7-ին, քննվում է ՀՀ 3-րդ նախագահ Սերժ Սարգսյանի եղբորորդու՝ Հայկ Սարգսյանի նախնական կալանքի հարցը:
Նիստը դռնբաց է: Հիշեցնենք, որ նախկինում մինչեւ գործը վարույթն ընդունելը՝ դատարանն առանց կողմերի մասնակցության որոշում էր մեղադրյալի խափանման միջոցի հարցը: Այս դրույթը, սակայն, ճանաչվել է հակասահմանադրական եւ այսուհետ նախնական կալանքի հարցերը քննարկվելու են կողմերի մասնակցությամբ:
Նշենք, որ գործն օրերս ուղարկվել է դատարան: Ըստ մեղադրական եզրակացության՝ Հայկ Սարգսյանը 2007թ. ապրիլի 1-ին ժամը 16:00-ի սահմաններում իր բնակության վայրի` Երևան քաղաքի Թումանյան փողոցի 11 շենքի 14 բնակարանի նկուղային հարկում գտնվող սենյակում քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող «SIGSAUER» տեսակի ատրճանակով Դավիթ Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում:
Հայկ Սարգսյանին մեղադրանք է առաջադրվել Քրեական օրենսգրքի 235-րդ հոդվածի 1-ին եւ 34-104-րդ հոդվածի 1-ին մասով:
Նշենք, որ Հայկ Սարգսյանն Ալեքսանդր Սարգսյանի որդին է:
