Հայ եկեղեցու պատմություն առարկայի դասավանդման վերանայման հարց նախարարությունում չի քննարկվել: Այս մասին, այսօր՝ հունվարի 31-ին, կռավարության նիստից հետո լրագրողների հետ զրույցում նշեց ԿԳ նախարար Արային Հարությունյանը: «Ես կարեւորում եմ բոլոր հայագիտական առարկաները, պարզապես բոլոր հայագիտական առարկաները եւ մնացած բոլոր առարկաները վերանայվելու են եւ առհասարակ ուսումնական ծրագրերը` բոլորը, վերանայվելու են»,- նշեց նա:

Արայիկ Հարությունյանը պատմեց, թե Արարատի մարզի դպրոցներից մեկում օրեր առաջ իրականում ինչ է տեղի ունեցել, որը հետագայում` որպես «ԿԳ նախարարի եւ քահանայի միջեւ բախում» է ներկայացվել. «Կա էդ գյուղում թե տարածքում տեր Դավիթ: Այն ընթացքում, որ ես այնտեղ եմ եղել (դպրոցում` այցով), նա եկել է, հարցրել եմ տնօրենին, թե ինչ է անում քահանան դպրոցում, տնօրենը պատասխանել է, որ քահանային հրավիրում են դասղեկական ժամերին»:

Նախարարը նշեց, որ յուրաքանչյուր դպրոց կարող է որոշել` այս կամ այն մարդը ի'նչ գործառույթ ունի իր կառույցում: Ինքը հարցը տվել է տնօրենին, եւ խոսակցությունը եղել է միայն դասղեկական ժամին հոգեւորականի ներկայության հետ կապված, ինչը, ըստ նախարարի, «մեծ խնդիր է»:

«Դասղեկական ժամերը նախատեսված են կազմակերպչական ծրագրեր իրականացնելու համար եւ ոչ թե հոգեւոր քարոզ իրականացնելու համար: Ասել եմ, որ դպրոցը աշխարհիկ կառույց է, եւ մեր հանդիպումը ավարտվել է ձեռքսեղմումով»,- ընդգծեց նա:

Նախարարը նաեւ հաղորդեց, որ նախատեսում է հավաքել եւ դիտարկել այս միջադեպի մասին հրապարակումները. «Եվ եթե դրանց մեջ զրպարտություն կա (իսկ դրանց մեջ զրպարտություն կա), մեղավորները պիտի պատասխանատվություն կրեն»:

Դիտարկմանը, որ ոմանք ակնկալում են, որ նախարարը պիտի ներողություն խնդրի քահանայից` Հարությունյանն արձագանքեց. «Էդ միջադեպի հետ կապ չունեցող քահանաները պիտի ներողություն խնդրեն»:

Հիշեցնենք, որ Արարատի մարզի դպրոցներից մեկն այցելության ժամանակ ԿԳ նախարարը, այնտեղ տեսնելով քահանային, հարցրել էր, թե ինչ գործ ունի վերջինս դպրոցում։ Սա հանրության շրջանում բուռն քննարկումների տեղիք էր տվել։